Pas disfatës nga PSG-ja, Raphinha qetëson Barcelonën: Nuk ka vend për panik para El Clasicos

Barcelona ka regjistruar humbjen e parë përgjatë këtij edicioni në Ligën e Kampionëve, pasi u mposht me shifrat 4:2 nga Paris Saint-Germain. Megjithatë, sulmuesi brazilian Raphinha vlerëson se ky rezultat nuk paraqet ndonjë dramë për skuadrën, duke bërë thirrje që humbja të mos e dekurajojë grupin në prag të përballjes vendimtare kundër Real Madridit. Në prononcimin e dhënë për mediat pas përfundimit të takimit, Raphinha ka bërë një analizë të ndeshjes, duke e pranuar forcën e parisienëve dhe duke përcjellë një mesazh motivues për sfidën e radhës, e cila është El Clasico. "E dinim se një skenar i tillë ishte i mundur. Ishin përballë një kundërshtari që e ka fituar dy herë Ligën e Kampionëve dhe atmosfera në stadiumin e tyre e bën ndeshjen jashtëzakonisht të vështirë. Synimi ynë ishte triumfi ose të paktën një barazim, por kjo nuk është fundi i botës. Këto disfata janë pjesë e lojës dhe në fund të llogarisë kemi lënë vetëm tri pikë rrugës", u shpreh ai. Tutje, futbollisti shtoi se ekipi duhet të shqyrtojë me kujdes gabimet e bëra dhe të fokusohet plotësisht te përgatitjet për sfidën e madhe ndaj madrilenëve. "Tani do të shohim udhëzimet e trajnerit për të korigjuar aspektet e lojës sonë dhe për të zbritur në fushë të përgatitur plotësisht për El Clasicon", shtoi tutje sulmuesi. Pavarësisht disfatës me katër gola të pësuar, Raphinha ka dhënë një vlerësim pozitiv për paraqitjen e katalanasve, duke nënvizuar se Barcelona dëshmoi kapacitetin për t'u matur me elitën e futbollit evropian. "Kemi të bëjmë me një skuadër që menaxhohet në mënyrë të shkëlqyer. Pavarësisht shifrave në tabelë, ne zhvilluam një paraqitje të mirë. Të dyja ekipet preferojnë qarkullimin e topit dhe ne arritëm të kishim kontrollin e posedimit. Ishte një test domethënës ku treguam se jemi konkurrues. Rezultati është ky që është, por unë mendoj se luajtëm mirë. Kjo humbje nuk duhet të lërë asnjë lloj pasoje tek ne në prag të ndeshjes me Real Madridin", përfundoi fjalën e tij Raphinha.