Përshkallëzohet kriza te Barcelona: Dani Olmo jashtë llogarive për superdeshinë e së dielës ndaj Real Madridit

Klubi katalanas ka pësuar një goditje të rëndë në prag të supersfidës kundër Real Madridit, pasi mesfushori Dani Olmo rrezikon të mos jetë i pranishëm në “El Clasicon” e kësaj të diele, si pasojë e një dëmtimi të marrë gjatë duelit ndaj Paris Saint-Germainit. Sipas burimeve mediatike nga Spanja, në kampin blaugrana mbizotëron shqetësimi se lojtari ka pësuar një dëmtim në muskulin aduktor, gjë që mund ta detyrojë të qëndrojë larg fushave të blerta deri në përfundim të ndërprerjes për shkak të ndeshjeve të kombëtareve. Në ditët në vijim, Olmo do t'i nënshtrohet testeve të detajuara mjekësore për të zbardhur shkallën e saktë të dëmtimit dhe kohën e nevojshme për rikuperim, ndërkohë që mungesa e tij përballë madrilenëve tashmë shihet si e pashmangshme. Përveç mesfushorit, trajneri nuk do të mund të llogaritë as shërbimet e mbrojtësit Eric Garcia për këtë takim vendimtar. Këto mungesa shtojnë presionin te shtabi teknik i Barcelonës, që kishte si synim të paraqitej me organikë të plotë në një nga sfidat më kyçe të edicionit aktual. Kujtojmë se përballja mes Barcelonës dhe Real Madridit është caktuar të luhet këtë të diel, ndërkohë që mbetet për t'u parë se si do të ecë procesi i shërimit për Dani Olmon.