Goditet rrjeti i narkotikëve në Kaçanik: Vihet në pranga i dyshuari, sekuestrohen dhjetëra bimë kanabis dhe marihuanë

Autoritetet e rendit kanë neutralizuar një veprimtari të paligjshme në rajonin e Kaçanikut, duke arrestuar një person të dyshuar për kultivim dhe shpërndarje të lëndëve narkotike. Operacioni policor është zhvilluar gjatë ditës së djeshme në fshatrat Doganaj dhe Vatë të kësaj komune. Gjatë kontrollit të detajuar të ushtruar në automjetin, shtëpinë dhe ambientet përcjellëse të të dyshuarit, i cili është shtetas kosovar, efektivët e policisë kanë zbuluar dhe sekuestruar prova të rëndësishme materiale. Në kuadër të këtij aksioni, janë konfiskuar 16.7 gramë substancë e dyshuar narkotike e llojit marihuanë, si dhe 41 bimë të gjalla të llojit Cannabis sativa, të cilat arrinin një peshë totale prej 2.112,3 gramësh. Po ashtu, si pjese e provave materiale janë sekuestruar edhe një pajisje telefonike dhe një palë gërshërë që dyshohet se përdoreshin për kultivimin e bimëve. Pas përfundimit të procedurave policore dhe intervistimit të rastit, prokurori i shtetit ka lëshuar urdhër për dërgimin e të dyshuarit në mbajtje, ndërkohë që ndaj tij janë iniciuar hetimet për veprat penale të posedimit të paautorizuar të narkotikëve dhe kultivimit të bimëve narkotike.