Uashingtoni mohon çdo gisht në kufizimin e shërbimit Starlink për forcat ukrainase

Sekretari i Shtetit i SHBA-së, Marco Rubio, ka hedhur poshtë me forcë çdo aludim për ndërhyrje të administratës amerikane në ngadalësimin e rrjetit satelitor Starlink, i cili shfrytëzohet nga ushtria ukrainase në konfliktin e vazhdueshëm me Rusinë. Gjatë një deklarate për mediat nga Mumbai i Indisë, ku po zhvillon një vizitë zyrtare treditore, kryediplomati amerikan theksoi se bëhet fjalë për një ndërmarrje private. "Starlink është një kompani private. Ata kanë një kontratë. Ata kanë kushte kontraktuale se si mund të përdoret kjo teknologji. Pika e rëndësishme është se ne nuk mund t’i drejtojmë një kompanie private vendimet që ajo merr ose nuk merr", u u shpreh Rubio përpara gazetarëve. Sipas tij, është krejtësisht e pavërtetë se kreu i Shtëpisë së Bardhë apo ndonjë strukturë tjetër shtetërore e SHBA-së ka kërkuar ndryshime në funksionimin e këtij sistemi, duke riafirmuar qëndrimin zyrtar të Uashingtonit. Reagimi i shefit të diplomacisë amerikane pason një artikull të publikuar të martën, ku pretendohej se themeluesi i SpaceX, Elon Musk, kishte urdhëruar kufizimin e shpejtësisë së versionit ushtarak të Starlink që përdoret nga trupat e Kievit. Burime brenda qeverisë amerikane kishin sugjeruar se ky frenim i shërbimit të internetit satelitor kishte lënë përkohësisht pa funksion disa nga dronët ushtarakë ukrainas. Pak kohë pas bërjes publike të këtyre pretendimeve, Musk reagoi në rrjetin social X duke hedhur topin te autoritetet amerikane, teksa shkroi se çdo kufizim në shpejtësi apo përdorim vendoset nga ushtria e SHBA-së dhe në fund të fundit nga Presidenti i Shteteve të Bashkuara. Megjithatë, situata mbetet e paqartë pas deklaratës së presidentit, i cili të hënën u tha gazetarëve se nuk ishte në dijeni se kush fshihej pas këtij ngadalësimi të Starlink, duke shtuar se do të dëshironte ta zbulonte një gjë të tillë. Në të njëjtën linjë me rregullat e tregut dhe pavarësinë korporatave ka folur edhe Sekretari i Mbrojtjes i SHBA-së, Pete Hegseth. Ai deklaroi të martën se autoritetet amerikane nuk kanë ndërmarrë ndonjë hap kufizues, por pranoi se Starlink ruan të drejtën e plotë për të marrë vendime në përputhje me kushtet e shërbimit të saj.