Koreografia horror dhe mesazhi kërcënues ndaj Barçës, klubi katalunas ndërmerr hapa zyrtarë në UEFA

Klubi i Barcelonës ka zyrtarizuar pakënaqësinë e tij në shtëpinë e futbollit evropian, UEFA, pas shfaqjes së një koreografie provokuese dhe kërcënuese nga ana e tifozëve ultras të Paris Saint-Germainit, e cila u desh të tërhiqte vëmendjen para fillimit të sfidës së Ligës së Kampionëve. Gjatë zhvillimit të koreografisë në sektorin e tifozëve vendas, u vu re një grafifikë e ngjashme me figurën famëkeqe të Jason nga prodhimi kinematografik horror “Friday the 13th”, i cili dukej teksa dëmtonte stemën e katalunasve përmes një sharre elektrike. Për më tepër, pamja shoqërohej nga një mbishkrim në gjuhën frënge, “Massacre à la parisienne”, shprehje e cila në gjuhën shqipe përkthehet si “Masakër në stilin parizien”. Përfaqësuesit e gjigantit spanjoll kanë dorëzuar ankesën formale pranë delegatit zyrtar të UEFA-s, i cili ndiqte nga afër zhvillimin e takimit në stadiumin “Parc des Princes”, gjatë intervalit të ndeshjes. Krahas shqetësimit për koreografinë, drejtuesit e Barcelonës kërkuan gjithashtu heqjen e menjëhershme të pankartave të tjera me përmbajtje fyese drejtuar institucionit të tyre, ku spikatnin shprehje si “Puta Barça”. Në radhët e klubit katalunas është konsideruar se grupet e tifozëve ultras të parizienëve kanë tejkaluar çdo normë sportive me pamjet dhe mesazhet e shfaqura në shkallët e stadiumit.