Financial Times: Netanyahu përgatiti sulme ndaj Iranit, ndërhyrja e Trump ndryshoi skenarin

Kryeministri i Izraelit, Benjamin Netanyahu, kishte përgatitur plane për nisjen e sulmeve ajrore kundër Iranit në fillim të këtij muaji. Megjithatë, ky plan u ndal pasi Presidenti i Shteteve e Bashkuara, Donald Trump, shprehu kundërshtimin e tij për riaktivizimin e tensioneve ushtarake në prag të zgjedhjeve të mesit të mandatit në SHBA, bën të ditur gazeta prestigjioze *Financial Times*. Sipas informacioneve të siguruara nga tre burime të ndryshme për median në fjalë, Forcat e Armatosura Izraelite (IDF) kishin finalizuar të gjitha përgatitjet për të ndërmarrë operacione sulmuese gjatë fundjavës së 10 tetorit. Objektivat kryesore të këtij plani përfshinin infrastrukturën e regjimit dhe komplekset bërthamore iraniane, si dhe impiancet civile, përfshirë termocentralet e prodhimit të energjisë. Megjithatë, intervenimi i kreut të Shtëpisë së Bardhë ka pezulluar çdo lëvizje, me qëllim shmangien e një konflikti të hapur para datës 3 nëntor, kur edhe do të mbahen zgjedhjet e mesit të mandatit në territorin amerikan. Të njëjtat burime theksojnë se ky aksion i planifikuar ushtarak do të ishte dukshëm më i fuqishëm krahasuar me sulmet e ndërmarra bashkërisht nga Uashingtoni dhe Tel Avivi gjatë muajit shkurt. Ky zhvillim vjen vetëm dy ditë pasi në media qarkulluan lajme rreth udhëtimit të fshehtë të Sekretarit amerikan të Mbrojtjes, Pete Hegseth, në Izrael. Gjatë kësaj vizite, ai zhvilloi një takim kokë më kokë me kryeministrin Netanyahu, ku në qendër të bisedimeve ishin sfidat dhe rreziqet e sigurisë në rajon.