Friedrich Merz paralajmëron Evropën: Po e nënvlerësoni rrezikun fatal që vjen nga Moska

Në një intervistë për gazetaren Francine Laqua të rrjetit Bloomberg, Kancelari gjerman Friedrich Merz ka dhënë një mesazh të qartë për liderët e kontinentit: Evropa po bën një gabim strategjik duke mos e vlerësuar sa duhet kërcënimin që Rusia paraqet për stabilitetin e shoqërive evropiane. Duke analizuar ndryshimet në politikën e jashtme të Shteteve të Bashkuara nën presidencën e Donald Trump, Merz theksoi se SHBA-ja ka ndërprerë tërësisht ndihmën financiare për Ukrainën që nga fillimi i vitit 2025. Pavarësisht kësaj, Kancelari gjerman bëri të ditur se për gati dy vjet, barra e financimit është mbajtur nga i ashtuquajturi 'Koalicioni i të Gatshmëve', i cili përfshin vende të Bashkimit Evropian dhe disa partnerë ndërkombëtarë. 'Kjo dëshmon se ne jemi të aftë të veprojmë të pavarur. Edhe pse është një sfidë e madhe për buxhetet tona, ne do të vazhdojmë ta mbështesim Ukrainën deri në përfundimin e kësaj lufte', u shpreh Merz. Ai shtoi se në çdo bashkëbisedim me Donald Trump, përpiqet të argumentojë se një Evropë e fortë dhe e qëndrueshme është në interesin strategjik të vetë amerikanëve. Lidhur me qasjen e re të Uashingtonit, Merz vlerësoi se motoja 'Ta bëjmë Amerikën Sërish të Madhe' nënkupton një politikë të pavarur amerikane, ndaj edhe Evropa duhet të ndjekë të njëjtën rrugë. 'Ne e kemi kuptuar mesazhin; tani do të veprojmë konform interesave tona', tha ai. Ai theksoi se Gjermania ka rritur shpenzimet për mbrojtjen në 5% të Prodhimit të Brendshëm Bruto, duke bashkëpunuar ngushtë me aleatë si Kanadaja. Kancelari gjerman konfirmoi se mbështetja publike për ndihmën ndaj Ukrainës mbetet solide në Gjermani, me rreth 60 për qind të qytetarëve që e përkrahin politikën aktuale. Për Merz, qëllimi kryesor mbetet dhënia fund e konfliktit, por gjithmonë duke respektuar sovranitetin dhe integritetin territorial të Ukrainës, të cilat ai i cilësoi si të panegociueshme. Në përmbyllje, Merz shprehu shqetësimin e thellë për atë që e quan 'nënvlerësim të rrezikut rus'. Sipas tij, lufta në Ukrainë është vetëm një fragment i një plani më të gjerë të Rusisë për të destabilizuar tërë rendin politik në kontinentin evropian, një realitet që sipas tij, shumëkush ende refuzon ta pranojë.