Moti për të mërkurën: Prishen kushtet atmosferike, rikthehen reshjet dhe shtrëngatat

Dita e mërkurë do të karakterizohet nga një paqëndrueshmëri e theksuar atmosferike, pasi vendi ynë do të ndikohet nga masa ajrore të paqëndrueshme që do të sjellin ndryshime në parametrat meteorologjikë. Parashikohet që qielli të mbizotërohet nga vranësira mesatare deri të dendura gjatë gjithë ditës. Reshjet e shiut, me intensitet të ulët, pritet të nisin që në orët e para të mëngjesit përgjatë zonave bregdetare, ndërsa më pas ato do të përhapen gradualisht në të gjithë territorin e vendit. Në pjesën veriperëndimore të vendit, moti do të jetë më intensiv, ku shirat do të vijnë në formën e shtrëngatave, të shoqëruara herë pas here edhe me shkarkesa elektrike. Sa i përket erës, ajo do të fryjë nga kuadrati i jugut me një shpejtësi mesatare prej 8 m/s. Megjithatë, përgjatë vijës bregdetare, erërat do të jenë më të fuqishme duke arritur shpejtësi deri në 16 m/s, çka do të ndikojë edhe në gjendjen e detit, ku valëzimi do të jetë i forcës 2 deri në 4 ballë.