Londra kërkon llogaridhënie për sulmin në Banjskë: Radoiçiçi duhet të përballet me drejtësinë

Mbretëria e Bashkuar ka rikonfirmuar përkushtimin e saj ndaj Kosovës, duke shprehur mbështetje të palëkundur për forcimin e demokracisë dhe zhvillimin e institucioneve shtetërore. Në një fjalim të mbajtur në Organizatën e Kombeve të Bashkuara, përfaqësuesja britanike vlerësoi progresin e arritur dhe bëri thirrje për veprime konkrete në zbardhjen e krimeve të së kaluarës dhe atyre më të freskëta. Duke vënë theksin te rëndësia e stabilitetit rajonal, Londra u bëri thirrje vendeve që ende nuk e kanë bërë këtë, që ta njohin pavarësinë e Kosovës. Sipas përfaqësueses britanike, normalizimi i marrëdhënieve mes Prishtinës dhe Beogradit është jetik për të ardhmen evropiane të të dyja shteteve, duke kërkuar angazhim serioz në dialogun e ndërmjetësuar nga Bashkimi Evropian dhe zbatim të plotë të Marrëveshjes së Ohrit. Në fushën e të drejtave të njeriut, Britania e Madhe kërkoi zbatimin praktik të garancive për komunitetet joshumicë në përputhje me standardet e sundimit të ligjit. Po ashtu, u kërkua një qasje më transparente nga Serbia sa i përket arkivave shtetërore, me qëllim zbardhjen e fatit të mbi 1.500 personave që rezultojnë ende të zhdukur nga periudha e luftës. Një pjesë e rëndësishme e deklaratës iu kushtua sulmit terrorist në Banjskë. Përfaqësuesja britanike kërkoi drejtësi për vrasjen e rreshterit të Policisë së Kosovës, Afrim Bunjaku, duke nënvizuar se autorët e këtij akti duhet të mbajnë përgjegjësi ligjore. Në këtë drejtim, ajo përmendi specifikisht Milan Radoiçiçin, duke kërkuar që ai të përballet me drejtësinë për rolin e tij në këtë ngjarje.