Përfaqësuesja amerikane në OKB flet për dialogun, zbulon qëndrimin e SHBA-së për seancat

Përfaqësuesja e Shteteve të Bashkuara të Amerikës në Organizatën e Kombeve të Bashkuara (OKB) ka deklaruar se SHBA-ja mbetet e përkushtuar ndaj paqes dhe stabilitetit në Ballkanin Perëndimor, duke theksuar rëndësinë e pajtimit ndërmjet Kosovës dhe Serbisë. Ajo tha se presidenti amerikan, Donald Trump, i vlerëson të dyja vendet dhe dëshiron paqe, stabilitet dhe prosperitet në rajon. Përfaqësuesja amerikane u bëri thirrje Kosovës dhe Serbisë që të tregojnë përmbajtje, të ndërmarrin hapa konkretë për ndërtimin e besimit dhe ruajtjen e stabilitetit, si dhe të angazhohen në mënyrë konstruktive në dialogun e lehtësuar nga Bashkimi Evropian. “Progresi afatgjatë do të vijë nga Prishtina dhe Beogradi, e jo nga Këshilli i Sigurimit”, deklaroi ajo. Në fund, ajo theksoi se qëndrimi i Shteteve të Bashkuara lidhur me numrin e seancave të Këshillit të Sigurimit për Kosovën nuk ka ndryshuar.