Legjendat në përballje: Messi dhe Ronaldo mes kandidatëve për çmimin historik 'Topi i Artë i të gjitha kohërave'

Lionel Messi dhe Cristiano Ronaldo janë sërish në qendër të vëmendjes, kësaj radhe si protagonistët kryesorë në garën për një titull unik, që organizohet për të shënuar 70-vjetorin e ndarjes së parë të çmimit prestigjioz “Topi i Artë”. Organizatorët kanë zbuluar listën e kandidatëve për çmimin “Topi i Artë i të gjitha kohërave”. Ky format i veçantë u mundëson tifozëve të votojnë për vitin specifik në të cilin një fitues i mëparshëm i këtij çmimi ka shfaqur formën e tij më të lartë individuale në karrierë. Në mesin e pretendentëve figurojnë emra që kanë shkruar historinë e futbollit botëror, ku përveç dyshes Messi-Ronaldo, bien në sy edhe figura si Johan Cruyff, Michel Platini dhe Ronaldo Nazario. Argjentinasi Lionel Messi është nominuar për tetë vite të ndryshme, përkatësisht për edicionet 2009, 2010, 2011, 2012, 2015, 2019, 2021 dhe 2023. Nga ana tjetër, Cristiano Ronaldo është përfshirë në listë me pesë vite: 2008, 2013, 2014, 2016 dhe 2017. Lista vazhdon me emra të tjerë legjendarë: Johan Cruyff (1971, 1973, 1974), Michel Platini (1983, 1984, 1985) dhe Marco van Basten (1988, 1989, 1992). Gjithashtu, në garë janë edhe Ronaldo Nazario (1997, 2002), Franz Beckenbauer (1972, 1976), Alfredo Di Stéfano (1957, 1959), Karl-Heinz Rummenigge (1980, 1981) dhe Kevin Keegan (1978, 1979). Procesi i votimit për tifozët do të jetë i hapur deri në mesnatën e 27 tetorit. Sipas informacioneve, çdo votë mbart një kosto prej një euroje, ndërsa shpallja e fituesit është parashikuar për datën 28 tetor. Ceremonia madhështore do të zhvillohet më 26 tetor në “Palladium” të Londrës. Vlen të theksohet se “Topi i Artë” u prezantua për herë të parë në vitin 1956, duke e bërë edicionin e vitit 2026 një jubile të rëndësishëm për këtë çmim që vlerëson më të mirët e botës së futbollit.