Përplasje të dhunshme në zemër të Tiranës: Policia përdor gaz lotsjellës dhe ujë, nisin arrestimet e protestuesve

Situata në bulevardin “Dëshmorët e Kombit” ka eskaluar në përleshje të ashpra mes protestuesve dhe forcave të rendit. Në përpjekje për të shpërndarë turmën dhe për të zhbllokuar aksin kryesor të kryeqytetit, policia ka ndërhyrë me mjete të forta, duke përdorur gaz lotsjellës, ujë me presion dhe spraj lotsjellës. Momente tensioni të lartë janë regjistruar kur një grup vajzash, në shenjë rezistence, janë ulur në mes të bulevardit për të penguar lëvizjen e efektivëve. Pavarësisht përdorimit të sprajit nga ana e policisë, ato kanë vijuar qëndresën, duke u përfshirë në përplasje fizike me uniformat blu që po tentonin t'i largonin nga rruga. Ndërkohë, pjesa tjetër e protestuesve i është kundërpërgjigjur ndërhyrjes me thirrje drejtuar efektivëve: “Hiqni kapelet, bashkohuni me ne”. Situata është rënduar më tej kur një grup protestuesish kanë sulmuar me gurë dhe bomba molotov mjetet e policisë që po përdornin ujë me presion për të vënë situatën nën kontroll. Si pasojë e kësaj ndërhyrjeje, policia ka nisur operacionin për shoqërimin dhe arrestimin e disa prej personave që ndodheshin në vijën e parë të protestës. Përleshjet kanë vazhduar gjatë procesit të lirimit të bulevardit, ndërsa deri në këto momente nuk është bërë ende publik një bilanc zyrtar lidhur me numrin e saktë të qytetarëve që janë dërguar në komisariat.