Thirrje urgjente nga Berisha: Të bashkohemi me studentët, mbi 2 mijë të rinj të dhunuar e të arrestuar

Kryetari i Partisë Demokratike, Sali Berisha, ka ndarë një videomesazh për opinionin publik, përmes të cilit ka ftuar qytetarët që të dalin në mbështetje të studentëve dhe rinisë, të cilët prej disa ditësh po zhvillojnë protesta kundër politikave qeveritare. Gjatë mesazhit të tij, kreu i opozitës ka hedhur akuza të forta ndaj kryeministrit Edi Rama për përdorimin e forcës policore ndaj protestuesve. Sipas tij, më shumë se dy mijë të rinj, përfshirë gjimnazistë, studentë dhe persona të mitur, janë bërë objekt i dhunës, ndalimeve dhe arrestimeve përgjatë valës së protestave. Duke vënë theksin te shkalla e masave të ndërmarra nga autoritetet, Berisha u shpreh: “Prej një jave, mbi 2 mijë vajza, djem, gjimnazistë, të mitur, studentë, janë dhunuar egërsisht, ndaluar apo arrestuar dhe kanë mbushur paraburgimet e vendit nga burgu famëzi i Burrelit gjer në burgun e Beratit.”