Skandali i foshnjave në Graçanicë, Vitia: Asnjë shkelje nuk do të kalojë pa u ndëshkuar

Ministri i Shëndetësisë, Arben Vitia, ka garantuar se do të ndërmerren të gjitha masat e nevojshme institucionale lidhur me rastin e ngatërrimit të foshnjave në “Spitalin Amerikan 2” në Graçanicë, duke shtuar se lëshimet nuk do të tolerohen në asnjë rrethanë. Duke folur për hapat e deritanishëm, Vitia konfirmoi se disa zyrtarë të përfshirë në procesin e inspektimit janë dërguar tashmë para Komisionit Disiplinor, ndërsa ndaj tyre janë shqyrtuar edhe sanksione të tjera për shkak të shkeljeve të dyshuara gjatë ushtrimit të detyrës. “Dje ka pasur një takim të kryeinspektorit dhe janë proceduar për Komision Disiplinor dhe vërejtje të tjera disa nga ata që për momentin supozohet se kanë bërë shkelje gjatë inspektimit. Kështu që të gjitha masat do të merren, nuk do të tolerohet asnjë lëshim nga asnjë institucion”, deklaroi ministri Vitia. Ai u bëri thirrje qytetarëve që, në rast se shfaqin pakënaqësi me vendimet apo veprimet e Inspektoratit Shëndetësor, të drejtohen drejtpërdrejt edhe në Ministrinë e Shëndetësisë për të kërkuar drejtësi e sqarime. Megjithëse theksoi se inspektorët shëndetësorë kanë për detyrë mbikëqyrjen e të gjitha subjekteve, qofshin publike apo private, Vitia pranoi se kontrolli i plotë i çdo institucioni në kohë reale mbetet një sfidë e pamundur. “E rëndësishme është që, kur bëhet kontrolli dhe identifikohen shkeljet, kudo që ato janë, të merren masat adekuate, konform legjislacionit në fuqi”, u shpreh ai, duke shtuar se për detaje shtesë rreth veprimeve të inspektorëve mund të kontaktohet kryeinspektori shëndetësor. Ngjarja tronditëse e ngatërrimit të foshnjave në “Spitalin Amerikan 2” dyshohet se ka ndodhur më 18 mars 2026. Sipas kallëzimit të familjarëve, foshnja fillimisht ishte marrë nga stafi mjekësor, ndërsa të nesërmen nënës i ishte dorëzuar një foshnjë tjetër. Vetëm pas insistimit këmbëngulës të prindërve dhe verifikimeve vijuese është zbuluar gabimi fatal. Në anën tjetër, përmes një komunikate zyrtare, Ministria e Shëndetësisë konfirmoi se Inspektorati Shëndetësor ka kryer inspektimin për këtë ngjarje të ndodhur më 18 mars 2026. Sipas këtij institucioni, gjatë kontrollit janë konstatuar mangësi serioze në procedurat e identifikimit dhe të verifikimit të foshnjës në momentin e dorëzimit te nëna. “Nga kontrolli i dokumenteve është konstatuar gjithashtu se infermierja, ndonëse posedon licencë të vlefshme pune, nuk ishte e deklaruar në sistemin e Departamentit të Licencimit dhe Akreditimit (DLA). Pas shqyrtimit të mënyrës së trajtimit të rastit, janë evidentuar mangësi edhe në veprimet e zyrtarëve të Inspektoratit Shëndetësor. Për këtë, Kryeinspektori Shëndetësor ka ndërmarrë këto masa: Inspektorja e rastit është referuar në Komisionin Disiplinor për shqyrtimin e shkeljes së dyshuar; zyrtarit të arkivit i është shqiptuar vërejtje me shkrim; përgjegjësit të Inspektoratit Shëndetësor i është shqiptuar vërejtje me gojë”, thuhet në njoftimin e MSH-së. Në mbyllje të komunikatës, Ministria e Shëndetësisë ka shprehur keqardhjen e saj të thellë për shqetësimin, tronditjen dhe pasigurinë e shkaktuar ndaj familjes së prekur nga ky rast i rëndë.