Chivu kërkon kthesën në Champions: Na duhet mentaliteti fitues ndaj Shakhtarit

Interi ndodhet para një momenti vendimtar në Ligën e Kampionëve, ku i duhet patjetër triumfi përballë Shakhtar Donetsk. Trajnerit Cristian Chivu i kërkohet të lërë pas serinë negative prej katër humbjesh rresht në këtë kompeticion dhe shtatë disfatave në tetë sfidat e fundit evropiane. Pavarësisht ecurisë pozitive dhe ritmit të lartë në kampionatin vendor, paraqitjet në arenën ndërkombëtare kanë qenë larg pritshmërive. Pas pengesave ndaj Real Madridit dhe Club Brugge, stafi teknik synon pikët e para të plota, të cilat do t'i shërbenin si hap i rëndësishëm drejt arritjes së objektivit minimal për kalimin në fazën “play-off”. “Dua që lojtarët e mi të kënaqen edhe në vështirësi. Duhet të kuptojnë rëndësinë e ndeshjeve dhe të marrin përgjegjësi pa humbur nga sytë lojën. Kështu është më e lehtë të fitosh”, – theksoi Chivu gjatë konferencës për shtyp. I pyetur nëse fjalët e tij të mëparshme nënkuptonin ndryshime rrënjësore në strukturën e skuadrës, tekniku zikaltër u tregua më specifik: “Kur fola pas ndeshjes me Brugge, e kisha fjalën për veten time, për mënyrën si i qasem grupit dhe si mund t’ua shpjegoj më mirë disa gjëra. Jam i shqetësuar, por për gjetjen e çelësit të duhur. Pikërisht këtë kisha parasysh”. Duke analizuar përballjen e radhës kundër ukrainasve, ai paralajmëroi për vështirësitë e takimit: “Si në çdo ndeshje të Champions-it, kundërshtarët tanë nuk kanë asgjë për të humbur dhe kanë ambicie. Duhet të kemi qëndrimin e duhur për ta fituar ndeshjen”.