Kriza e strehimit në Portugali: Policia ndërhyn me forcë, arrestohen dhjetëra protestues dhe hiqen tendat

Përshkallëzohet situata në Portugali, ku autoritetet policore kanë vënë në pranga 55 persona në Lisbonë dhe Porto, si dhe kanë ndërmarrë një operacion për sekuestrimin e tendave të ngritura nga qytetarët. Vala e protestave ka shpërthyer si pasojë e rritjes galopante të çmimeve të banimit. Kjo lëvizje qytetare në tokën portugeze vjen nën frymën e solidaritetit me protestat e ngjashme që po zhvillohen prej javësh në Madrid të Spanjës, ku tendat janë bërë simbol i pakënaqësisë sociale. Tensioni mes demonstruesve dhe ekzekutivit është rritur ndjeshëm, pasi këtë të fundit protestuesit e akuzojnë për pasivitet përballë krizës së thellë të strehimit. Sipas tyre, qeveria po synon të kalojë reforma në tregun e qirave që lehtësojnë dëbimin e qiramarrësve nga shtëpitë e tyre. Në orët e para të mëngjesit të së martës, efektivët e policisë mbërritën me furgonë në sheshet kryesore "Rossio" dhe "Praça D. João I", duke u lënë protestuesve një afat prej pesë deri në dhjetë minuta për t'u larguar dhe për t'i dhënë fund tubimit. Interventa e forcave të rendit u bazua në vendimin se grumbullimet kishin humbur ligjshmërinë. Në Lisbonë, thirrja e policisë u shoqërua me rezistencë, ku qytetarët u lidhën mes tyre duke formuar një zinxhir njerëzor për të penguar aksionin. Gjatë përplasjeve, drejt Policisë së Sigurisë Publike u hodhën sende të ndryshme nga protestuesit, ndërsa agjentët e rendit u kundërpërgjigjën duke përdorur shkopinjtë e gomës. Më pas, njësitë e specializuara të policisë spastruan plotësisht sheshin "Rossio" nga prania e demonstruesve. Pjesë e turmës u zhvendos më pas në sheshin "Praça da Figueira", ku manifestuesit vijuan të shfrynin revoltën e tyre ndaj ndërhyrjes policore, duke kërkuar me këmbëngulje kthimin e gjërave të tyre personale dhe lirimin e menjëhershëm të të ndaluarve. Për të mbajtur situatën nën kontroll, forcat e rendit kanë nisur vendosjen e barrierave metalike me qëllim bllokimin e aksesit në këtë zonë. Pas pastrimit të shesheve në Lisbonë dhe Porto nga kampet e improvizuara, ekipet kompetente kanë nisur menjëherë operacionet e pastrimit të mjedisit. Ndërkohë, pavarësisht ndërhyrjes së forcave të sigurisë, organizatorët kanë paralajmëruar një protestë të re në sheshin Rossio të Lisbonës, e cila është caktuar të mbahet të martën në orën 19:00, sipas orës lokale.