Reagim i fortë në Maqedoni: Prokurorët kërkojnë vendim urgjent nga Gjykata Kushtetuese për pagat

Këshilli i Prokurorëve Publikë, Prokuroria Publike dhe Shoqata e Prokurorëve Publikë i kanë bërë thirrje Gjykatës Kushtetuese që të veprojë pa humbur kohë lidhur me ndryshimet ligjore që kanë sjellë uljen e koeficientëve për llogaritjen e pagave të prokurorëve për herë të tretë. Këto tre institucione dhe organizata shprehin shqetësimin se Gjykata Kushtetuese ka mbi tetë muaj që nuk ka marrë ndonjë vendim mbi nismat për vlerësimin e kushtetutshmërisë së këtyre ndryshimeve, pavarësisht se më parë vetë gjykata kishte ngritur dyshime se zvogëlimi i koeficientëve dëmton pavarësinë e sistemit prokurorial të mbrojtur me kushtetutë. "Mosveprimi i Gjykatës Kushtetuese jo vetëm që vë në pikëpyetje pavarësinë e Prokurorisë Publike dhe parimet e sundimit të ligjit, por gjithashtu krijon një pabarazi serioze midis funksioneve gjyqësore dhe prokuroriale publike, gjë që është në kundërshtim me standardet evropiane dhe ndërkombëtare", theksohet në deklaratën e përbashkët. Nga radhët e prokurorëve vlerësojnë se çdo zvarritje e mëtejshme e këtij vendimi është e pajustifikueshme dhe rrezikon të vështirësojë ndjeshëm mbarëvajtjen e punës në këtë institucion. Gjithashtu, sipas tyre, të ardhurat e prokurorëve publikë në Maqedoni vazhdojnë të mbeten ndër më të ulëtat në rajon, ndërkohë që situata rëndohet edhe më shumë nga deficit i stafit, buxheti i pamjaftueshëm dhe kushtet e rënda të punës.