Përplasja e fortë/ Çitaku i ashpër ndaj Trendafilovës: Gjykata Speciale ka shkatërruar besimin e publikut në drejtësi

Sekretarja e Përgjithshme e Partisë Demokratike të Kosovës, Vlora Çitaku, ka drejtuar kritika të ashpra ndaj kryetares së Dhomave të Specializuara në Hagë, Ekaterina Trendafilova, duke e vënë në shënjestër mënyrën se a po udhëhiqet ky institucion dhe duke kërkuar llogaridhënie e transparencë të plotë. Reagimi i zyrtares së lartë të PDK-së erdhi pas një adresimi në formë videoje nga Trendafilova, për të cilin Çitaku tha se, duke mos lejuar hapësirë për pyetje nga ana e gazetarëve, dështon t’i japë përgjigje brengave të ngritura ndër vite rreth funksionimit të kësaj gjykate. "Nën drejtimin tuaj, Specialja e ka cenuar rëndë besimin në drejtësi. Një proces i padrejtë, mungesë transparence, llogaridhënie e pamjaftueshme dhe mangësi serioze në mbikëqyrje. Shqetësimet e ekspertëve ndërkombëtarë për barazinë e palëve, shkeljen e të drejtave të njeriut dhe monitorimin e pavarur kërkojnë përgjigje konkrete. Ju na ofroni deklarata vetëlavdëruese", ka shkruar nënkryetarja e Kuvendit në shkrimin e saj publik. Ajo ka shtuar gjithashtu se statusi ndërkombëtar nuk përbën imunitet nga përgjegjësia, duke theksuar se: "Pavarësia nuk ju vendos mbi ligjin. Prejardhja ndërkombëtare e gjyqtarëve nuk është certifikatë pagabueshmërie", teksa ka ftuar kryetaren e Speciales që të dalë përballë medias dhe të ballafaqohet me pyetjet sfiduese. Sipas vlerësimit të saj, shqetësimet dhe vërejtjet ndaj këtij institucioni nuk mund të zhvlerësohen duke u etiketuar si dezinformim, por kërkojnë trajtim serioz dhe përgjigje meritore. Çitaku ka vënë në pah se barra e përgjegjësisë për mbarëvajtjen dhe vendimmarrjen e gjykatës bie drejtpërdrejt mbi kryetaren e saj, e cila duhet të japë llogari për punën e bërë. Në fund, deputetja e PDK-së konfirmoi se Kosova do të mbetet e palëkundur në mbështetjen e saj ndaj ish-udhëheqësve të Ushtrisë Çlirimtare të Kosovës në fazën e apelit, duke shfrytëzuar çdo mekanizëm ligjor e institucional për të kundërshtuar çdo tendencë për padrejtësi. "Kërkojmë drejtësi për çlirimtarët! Sepse padrejtësia nuk bëhet drejtësi vetëm pse shqiptohet në Hagë", ka përfunduar ajo, ndërkohë që nga ana e saj, Ekaterina Trendafilova ka theksuar më parë se askush nuk ka të drejtë t'u diktojë gjykatësve mënyrën e interpretimit dhe zbatimit të ligjit.