Skema milionëshe me importin e derivateve: Prokuroria Speciale ngre aktakuzë ndaj 12 personave

Prokuroria Speciale ka zyrtarizuar aktakuzën kundër dymbëdhjetë personave, të cilët dyshohen për përfshirje në një sërë veprash penale që lidhen me keqpërdorime financiare dhe veprimtari të organizuara kriminale. Të pandehurit ngarkohen nga organet e drejtësisë për vepra të rënda penale, duke përfshirë "Pjesëmarrjen ose organizimin e grupit kriminal të organizuar", në lidhje me veprat "Mashtrimi", "Shmangia nga tatimi", "Shpëlarja e parave", "Falsifikimi i parasë", si dhe "Mbajtja në pronësi, kontroll ose posedim të paautorizuar të armëve" dhe "Përdorimi i armës apo mjetit të rrezikshëm". Në dokumentin e prokurorisë thuhet se të akuzuarit F.M., F.M., K.V., F.V., S.K., N.B., D.M., A.M., M.M., N.M., G.Q. dhe S.M., kanë vepruar në bashkëpunim të ngushtë gjatë harkut kohor nga janari i vitit 2021 deri në dhjetor të vitit 2025. Skema kriminale përfshinte importimin e naftës, shfrytëzimin e autoboteve të përshtatura posaçërisht, lëshimin e faturave për transaksione fiktive, si dhe raportimin e rremë të qarkullimit dhe detyrimeve fiskale. Këto veprime të paligjshme i kanë sjellë buxhetit shtetëror një dëm të konsiderueshëm financiar prej 4,637,893.69 eurosh. Operacioni policor që rezultoi me prangosjen e personave që tashmë janë zyrtarisht të akuzuar, ishte ndërmarrë gjatë muajit janar të këtij viti.