Nga Vjena, Osmani përcjell mesazhin e fuqishëm: Qytetarët e zakonshëm janë ata që japin drejtimin e historisë

Në kuadër të kremtimit të njëshekullorit të Kongresit të Paneuropa në kryeqytetin austriak, ish-presidentja Vjosa Osmani ka mbajtur një fjalim solemn, i cili u përqendrua te rrugëtimi historik dhe sakrificat e popullit të Kosovës. Gjatë fjalës së saj, ajo solli në vëmendje sfidat e mëdha të kalimit nga periudha e luftës drejt themelimit të një shoqërie demokratike, duke vënë theksin te rezistenca e jashtëzakonshme e qytetarëve, siç ishte mbajtja e procesit arsimor nën rrethim, mes bombardimeve dhe kushteve ekstreme. "Kam parë një komb të dalë nga lufta dhe të ndërtojë një shtet demokratik nga hiri. Kam parë klasa të ndërtuara në tenda dhe arsimin të zhvillohet nën bombardime dhe i rrethuar nga tanket, por kjo u bë pikënisja e së ardhmes së një brezi të tërë. Dhe kam mësuar se historia nuk lëviz vetë", u shpreh ajo para të pranishmëve. Duke analizuar momentet kyçe të zhvillimit të shteteve, ish-presidentja theksoi se vendimtare nuk janë vetëm figurat institucionale apo liderët politikë, por guximi i individëve të thjeshtë. "Nuk lëviz vetëm nga presidentët, kryeministrat dhe qeveritë. Në fakt, në çastet më vendimtare të një kombi, historinë e ndryshojnë njerëzit më të zakonshëm, të cilët vendosin të thonë: mjaft! Mjaft me urrejtjen, mjaft me frikën, mjaft me autokracinë, mjaft me propagandën…", deklaroi Osmani gjatë këtij aktiviteti të rëndësishëm ndërkombëtar.