Kontrata Kolektive: Gjykata Komerciale nis shqyrtimin e padisë së Komunës së Gjakovës për kompensimin e dëmit

Sot, në orën 10:00, në Gjykatën Komerciale do të zhvillohet seanca e parë përgatitore lidhur me padinë e ngritur nga Komuna e Gjakovës, e cila kërkon zhdëmtimin e financave të saj për shkak të detyrimeve që kanë rrjedhur nga Kontrata Kolektive. Sipas Asociacionit të Komunave të Kosovës (AKK), pushtetit lokal i janë tërhequr qindra miliona euro nga buxhetet vetanake për të mbuluar obligimet e marra përsipër nga niveli qendror. Bëhet e ditur se këto mjete financiare ishin të parapara për t'u realizuar në projekte e investime kapitale, si dhe për rritjen e cilësisë së shërbimeve të përditshme ndaj qytetarëve. Përmes një komunikate zyrtare, AKK-ja ka kërkuar vendimmarrje meritore dhe pa vonesa nga sistemi i drejtësisë. “AKK-ja pret shqyrtim të drejtë dhe pa zvarritje të mëtejshme. Pas më shumë se katër vitesh pritjeje, komunat meritojnë drejtësi dhe kompensim”, thuhet në njoftim.