Aspirata për LDK-në, Përparim Rama shpreh gatishmërinë për të marrë frerët e partisë

Kryetari i Komunës së Prishtinës, Përparim Rama, ka bërë të publike gatishmërinë e tij për të udhëhequr në të ardhmen Lidhjen Demokratike të Kosovës (LDK), duke konfirmuar ambiciet e tij brenda strukturave të këtij subjekti politik. Gjatë një paraqitjeje televizive në emisionin “DPT te Fidani”, Rama theksoi se është tërësisht i përgatitur për një angazhim të tillë, ndërsa bëri me dije se ka zhvilluar komunikime të hapura si me kryetarin aktual të partisë, Lumir Abdixhiku, ashtu edhe me figura të tjera brenda kësaj force politike. “Unë i kam ndihmuar Lidhjes Demokratike të Kosovës. Pas 12 viteve, LDK është e para në kryeqytet, dhe e kam ofruar, po them, ndihmën time gjatë gjithë kohës dhe vazhdoj me e ofru këtë ndihmë. Normal që jam i interesuar me i ndihmu Lidhjes Demokratike të Kosovës, dhe me nxjerr prej aty ku është. Si gjithmonë, kam qenë aty për ta, jam aty për ta, do të jem aty për ta”, u shpreh Rama. Pavarësisht kësaj gatishmërie të theksuar, i pari i kryeqytetit bëri të ditur se ende nuk e ka marrë një vendim përfundimtar lidhur me mundësinë e kandidimit për kryetar në zgjedhjet e ardhshme të brendshme të partisë. “Ende nuk e kam marr vendimin, por besoj që po!”, u shpreh ai.