Sela bën thirrje për mbështetjen e Arkin Jahijut në Bërvenicë, ashpër kundër deklaratës së Sulejmanit

Kryetari i Lidhjes Shqiptare, Ziadin Sela, u ka bërë thirrje bashkatdhetarëve, me theks të veçantë atyre në diasporë, që të bashkohen rreth mbështetjes së kandidatit shqiptar, Arkin Jahiju, në balotazhin për Komunën e Bërvenicës. Sela ka vënë inatin politik në plan të parë, duke e konsideruar triumfin e një shqiptari në këtë komunë si një objektiv parësor, ndërkohë që ka ofruar mbështetjen e tij të plotë dhe të pakushtëzuar për Jahijun përgjatë garës së balotazhit. "Pa marrë parasysh gjithçkaje, shqiptarë, ju lutem, diaspora, ju lutem, është shumë e rëndësishme që në Bërvenicë të fitojë kandidati shqiptar. Këtë garë e udhëheq Arkin Jahiju. Dhe po e them publikisht, jam në dispozicion të shqiptarit Arkin Jahiju në raundin e dytë të zgjedhjeve lokale, si ta mendojë ai", u shpreh Sela gjatë një paraqitjeje televizive. Në të njëjtën kohë, kreu i Lidhjes Shqiptare ka lëshuar kritika të rënda ndaj qëndrimit të zëdhënësit të VLEN-it, Driton Sulejmani, duke e etiketuar fjalorin e tij lidhur me mbështetjen e kandidatëve në Bërvenicë si tejet fyes dhe të papranueshëm. "Skandaloze. Deklarata e Driton Sulejmanit, zëvendësministrit të Arsimit, është deklaratë prej një servili dhe është një deklaratë e një pakurrizori, i cili deklaroi se kryesia e VLEN-it do të diskutojë në atë drejtim se kush do të përkrahet në raundin e dytë. Folën qytetarët e Bërvenicës, folën qartazi. Dhe këtu nuk është më çështje e qëndrimit të subjekteve politike. Kanë folur qytetarët dhe ne vetëm duhet të dëgjojmë zërin e tyre", përfundoi Sela.