Ish-veprimtari Faton Topalli zbulon emrat dhe rrëfen prapaskenat e lidhjeve me UDB-në

Në kuadër të ciklit hulumtues “Dosjet” në emisionin Debat Plus, ish-veprimtari Faton Topalli ka ngritur pretendime të bujshme duke përmendur emra konkretë shqiptarësh, të cilët sipas tij kanë pasur lidhje me shërbimin sekret jugosllav, UDB-në. Gjatë rrëfimit të tij për protestat e fuqishme të vitit 1981 në Kosovë dhe ngjarjet e tensionuara në konviktet studentore, Topalli ka veçuar rastin e Nevruz Isufit. Ai ka deklaruar se Isufi kishte përkrahur dy individë nga Peja, të cilët synonin të arrestonin Ali Lajçin më 25 mars 1981. Sipas dëshmisë së dhënë, ky plan dështoi falë ndërhyrjes së Abdullah Prapashticës, i cili ndaloi personat e përfshirë duke u thënë se ekzistonte një urdhër zyrtar që ndalonte arrestimet në hapësira publike. Po ashtu, Topalli ka vënë në shënjestër edhe Zymber Zymberin, duke e cilësuar si pjesë të mekanizmave të sigurisë së asaj periudhe, ndërsa ka hedhur dritë edhe mbi rolin e një personi me mbiemrin Pepshi, për të cilin tha se vepronte si informator në radhët e studentëve. “UDB-ja e ka pasë një spiun brenda, mes grupit të studentëve, i cili e ka mbiemrin Pepshi”, ka theksuar Topalli gjatë intervistës. Sipas të dhënave që posedon ish-veprimtari, ky informator e mbante të informuar Nevruz Isufin për çdo lëvizje dhe zhvillim që ndodhte brenda konvikteve studentore. Në vazhdim të bisedës, Topalli ka trajtuar edhe skemën se si, sipas tij, të dhënat dhe informacionet e siguruara nga konviktet përcilleshin te strukturat e larta politike dhe të sigurisë në Kosovën e asaj kohe.