Trazirat para Gjykatës së Apelit: Pesë të arrestuar dhe 15 në kërkim për vandalizmin e institucionit

Policia ka ndërhyrë duke vënë në pranga pesë persona dhe ka shpallur në kërkim 15 të tjerë, pasi dyshohet se gjatë protestës së zhvilluar ditën e sotme kanë sulmuar me sende të forta godinën e Gjykatës së Apelit, duke dëmtuar dyert dhe dritaret e saj. Në bazë të verifikimeve dhe veprimeve të shpejta hetimore të kryera përgjatë tubimit, uniformat blu kanë arritur të identifikojnë gjithsej 20 persona të përfshirë në aktet e dhunës dhe dëmtimit të pronës shtetërore. Pas ndërhyrjes, efektivët e policisë arrestuan shtetasit A. P., 37 vjeç, S. R., 32 vjeç, L. D., 20 vjeç, P. P., 24 vjeç, si dhe një të mitur 16-vjeçar. Gjatë kontrollit fizik të ushtruar ndaj adoleshentit, autoritetet bënë të mundur sekuestrimin e disa lëndëve piroteknike si provë materiale. Ndërkohë, 15 personat e tjerë të dyshuar si pjesëmarrës në këtë sulm janë shpallur zyrtarisht në kërkim policor, ndërsa grupi hetimor po vijon aksionin në terren për kapjen e tyre. Në përfundim të veprimeve të para hetimore, materialet procedurale i kanë kaluar Prokurorisë për ndjekjen e mëtejshme të përgjegjësisë ligjore të secilit prej autorëve.