Milano llogarit dëmet milionëshe pas dy ditësh dhune urbane, autoritetet në gatishmëri për protesta të reja

Metropoli italian i Milanos po përpiqet t'i rikthehet qetësisë pas një fundjave të shënuar nga trazira të rënda, akte grabitjesh dhe përplasje të dhunshme në zemër të qytetit. Pamjet në zonën e “Piazza Duomo”-s dhe rrugët përreth flasin qartë për dëmet e shkaktuara, me vitrina të thyera, dyqane të plaçkitura, si dhe monopatina e kosha mbeturinash të shpërndara nëpër rrugë. Ndërkohë, strukturat e sigurisë janë vënë në gatishmëri të lartë pas qarkullimit të një thirrjeje të re në rrjetet sociale për një tubim të paralajmëruar në orën 15:00. Sipas vlerësimeve të paraqitura nga Confcommercio Milano, faturimi i dëmeve materiale në bizneset e qendrës ka kapur shifrën e rreth një milioni eurosh. Bilanci zyrtar i trazirave të ndodhura të dielën, më 18 tetor, flet për 271 persona të shoqëruar në polici, 32 të arrestuar dhe 28 të denoncuar. Nga numri i të arrestuarve, 23 janë të mitur, kurse 14 efektivi të forcave të rendit kanë pësuar lëndime gjatë ndërhyrjeve. Pas episodeve të dhunshme të së shtunës, më 17 tetor, gjatë një proteste të orientuar kundër shtrenjtimit të jetesës dhe qeverisë, situata u përshkallëzua edhe të dielën kur grupe të tjera të rinjsh u grumbulluan në qendër, duke krijuar skena të mirëfillta të dhunës urbane. Tani, përmes aplikacioneve si Telegram dhe platformave të tjera sociale, po shpërndahet një thirrje e re që u bën thirrje të rinjve të mblidhen sërish në Piazza Duomo në orën 15:00. “Duhet ta bëjmë zërin tonë të dëgjohet”, shkruhet në mesazhin orientues që qarkullon online. Megjithatë, brenda thirrjes bëhet thirrje që protestuesit të shmangin dhunën ndaj punonjësve, të moshuarve dhe grave, duke shtuar: “Të tregojmë se kemi vlera dhe se duam ta bëjmë zërin tonë të dëgjohet”. Në skenë ka dalë gjithashtu një grupim i ri i pagëzuar si “Movimento del 17 ottobre” (Lëvizja e 17 Tetorit), i cili ka paralajmëruar aksione të reja mobilizimi. Në rrafshin ligjor, Prokuroria e Milanos ka zyrtarizuar kërkesën për caktimin e masës së sigurisë “arrest në burg” për 11 të rinj madhorë të ndaluar gjatë trazirave të fundjavës. Prej tyre, pesë u vunë në pranga për ngjarjet e së shtunës, ndërsa gjashtë të tjerë për përshkallëzimin dhe grabitjet e së dielës. Të dyshuarit ngarkohen me akuza të rënda për shkatërrim pronëie dhe plaçkitje, vepra penale që sipas nenit 419 të Kodit Penal italian parashikojnë dënime deri në 15 vjet heqje lirie, si dhe për veprën e kundërshtimit të forcave të rendit me rrethana rënduese. Paralelisht, hetimet po shtrihen edhe te të miturit e ndaluar. Sipas të dhënave, 11 të mitur të kapur pas ngjarjeve të së shtunës pritet të dalin para pyetjeve në institutin e të miturve Beccaria, ndërkohë që prokuroria përkatëse po harton kërkesat për vleftësimin e arresteve dhe caktimin e masave të sigurisë. Në total, numri i përgjithshëm i ndalimeve gjatë dy ditëve të protestave të dhunshme ka arritur në 34, duke përfshirë 23 të miturit e ndaluar të dielën dhe 11 të rriturit e arrestuar të shtunën, ndërsa hetimet mbeten të hapura për identifikimin e personave të tjerë. Zëvendëskryeministri italian Matteo Salvini ka reaguar ashpër ndaj akteve të dhunës të shënuara gjatë fundjavës, duke ngritur shqetësimin se skenat mund të kishin përfunduar me pasoja fatale. “Dikush kërkonte një të vdekur, për fat të mirë kjo nuk ndodhi”, deklaroi Salvini, duke iu referuar valës së grabitjeve dhe shkatërrimeve që përfshinë disa qytete në vend. Ai ka propozuar gjithashtu masa drastike, duke kërkuar që Piazza Duomo të mos jepet më për organizimin e manifestimeve dhe duke sugjeruar izolimin e plotë të sheshit për të shmangur çdo mundësi përsëritjeje të akteve të tilla të dhunshme, pasi sipas tij, ruajtja e simboleve ka një rëndësi parësore.