Pakënaqësi te Milani pas triumfit ndaj Atalantës, Rabiot: Nuk jam i sigurt nëse e merituam këtë fitore

Pavarësisht se Milani arriti të triumfojë me shifrat 3:2 kundër Atalantës, rezultati nuk e ka lënë të kënaqur mesfushorin Adrien Rabiot. Ky i fundit ka lëshuar kritika të forta në drejtim të skuadrës për shkak të rënies drastike të përqendrimit gjatë fraksionit të dytë të lojës. Edhe pse kuqezinjtë kishin krijuar një epërsi të sigurt në fushë, në minutat e fundit u detyruan të vuanin për të mbrojtur tri pikët. Një situatë e tillë e ka shqetësuar thellësisht francezin, i cili ka shprehur hapur zhgënjimin e tij pavarësisht suksesit në këtë përballje. “E zhvilluam shumë mirë pjesën e parë, por më pas, çuditërisht, në të dytën e humbëm kontrollin e ndeshjes. Jam shumë i nervozuar, sepse nëse luajmë kështu në pjesën e dytë, atëherë nuk vlen asgjë paraqitja e mirë në të parën. Fatmirësisht fituam, por nuk e di nëse e merituam”, u shpreh mesfushori francez gjatë deklaratës së tij. Më tej, Rabiot analizoi edhe mungesën e fokusit që ekipi ka shfaqur në disa sfida, duke saktësuar se rrënjët e problemit nuk duhet të kërkohen te përgatitja fizike, por te qasja psikologjike dhe mentaliteti i grupit. “Problemi nuk është fizik, por psikologjik. Ishim në epërsi prej tre golash dhe më pas e ulëm vëmendjen dhe përqendrimin. Kur përballesh me një skuadër cilësore, rrezikon të barazohesh ose edhe të humbasësh”, theksoi ai. Reprezentuesi francez vuri në dukje se grupi ka nevojë për punë shtesë në planin mental, duke përfshirë këtu edhe futbollistët që futen në lojë nga stoli i rezervave. “E kam thënë edhe pas ndeshjes me Sassuolon se duhet të punojmë për mentalitetin. Edhe ata që hyjnë në fushë nga stoli duhet të japin më shumë dhe të përshtaten menjëherë me ritmin e ndeshjes. Futbolli është i tillë: nëse e humb përqendrimin, rrezikon ta humbësh ndeshjen”, shtoi mesfushori. Megjithatë, pavarësisht tonit kritik, lojtari pranoi vlerën e madhe të këtij triumfi, duke përcjellë një mesazh se Milani duhet të ruajë vazhdimësinë për 90 minuta nëse synon të përmbushë aspiratat e këtij edicioni. “Gjithsesi, janë tri pikë të rëndësishme”, përfundoi Rabiot.