Tensioni i protestave, ECPMF lëshon alarmin: Ndaloni menjëherë dhunën dhe pengimin e gazetarëve

Qendra Evropiane për Lirinë e Shtypit dhe Medias (ECPMF) ka ngritur alarmin përmes një reagimi zyrtar lidhur me valën e agresionit ndaj punonjësve të medias gjatë ditëve të protestave. Sipas të dhënave të bëra publike, në terren janë regjistruar jo më pak se 25 episode dhune dhe cënimi të sigurisë së gazetarëve. Organizata ndërkombëtare, selia e së cilës ndodhet në Leipzig të Gjermanisë, ka dënuar me tonet më të ashpra çdo formë presioni, agresioni apo pengimi të ushtrimit të profesionit të lirë. Duke iu referuar raporteve të ardhura nga Shoqata e Gazetarëve të Shqipërisë (AGSH), ECPMF thekson se një pjesë e konsiderueshme e këtyre incidenteve mbajnë firmën e efektivëve të policisë, të cilët kanë ndërhyrë duke mos i lënë gazetarët të raportojnë lirshëm ngjarjet. Në këtë linjë, institucioni evropian i ka drejtuar një thirrje publike drejtorit të përgjithshëm të Policisë së Shtetit, Skëndër Hita, që të nisë pa humbur kohë një tryezë dialogu me AGSH-në dhe strukturat e tjera të medias, me qëllim vendosjen e protokolleve të qarta dhe të menjëhershme të sigurisë për gazetarët që ndjekin nga afër tubimet dhe zhvillimet e tjera publike.