Vlora Çitaku do të përfaqësojë Kuvendin në grupin punues për strategjinë e ish-krerëve të UÇK-së

Nënkryetarja e Kuvendit të Kosovës, Vlora Çitaku, është caktuar për të përfaqësuar organin legjislativ në grupin e ri punues, i cili do të merret me hartimin e strategjisë shtetërore për procedurat e apelit në Dhomat e Specializuara në Hagë për ish-krerët e Ushtrisë Çlirimtare të Kosovës. Këtë vendim e ka bërë të ditur kryetarja e Kuvendit, Albulena Haxhiu, në përfundim të mbledhjes së Kryesisë së Kuvendit të mbajtur këtë të mërkurë, duke shtuar se përfshirja e drejtpërdrejtë e këtij institucioni synon të japë një ndikim thelbësor në këtë drejtim. Haxhiu theksoi se Kuvendi do të mbetet në kontakt të vazhdueshëm me Çitaku, ndërsa bëri të ditur se në këtë nismë do të angazhohen edhe ekspertë të fushës për të ofruar mbështetjen e tyre profesionale. “Kryesia e Kuvendit ka caktuar nënkryetaren Vlora Çitaku si anëtare në grupin punues për hartimin e strategjisë për procedurat e apelit para Dhomave të Specializuara në Hagë. Si kryetare e Kuvendit, e kam mirëpritur vendimin e Qeverisë në raport me këtë proces. Gjithmonë kam konsideruar se rruga më e mirë për këtë proces është të formohet strategjia. Ne do të jemi në komunikim të vazhdueshëm me anëtaren që sapo e deleguam në këtë grup, në mënyrë që Kuvendi të japë kontribut maksimal. Po ashtu, do të ftohen edhe ekspertë të fushës që mund të japin kontributin e tyre profesional në këtë grup”, u shpreh Haxhiu. Kryeparlamentarja nënvizuar gjithashtu se çdo hap i ndërmarrë do të koordinohet ngushtësisht me ekipet mbrojtëse të ish-krerëve të UÇK-së, me qëllim që angazhimi institucional të prodhojë efekte konkrete në procesin e gjykimit. Ajo ritheksoi se vëmendja kryesore duhet t'i kushtohet punës së grupit punues, kontributit të ekspertëve dhe bashkëpunimit me mbrojtjen. “Çfarëdo veprimi i yni duhet të jetë i koordinuar me ekipet mbrojtëse. Ne kemi pasur diskutime të gjata sa i përket ligjit që është miratuar në Kuvend dhe pret të dekretohet nga presidentja. Është e rëndësishme të marrim veprime që ndikojnë drejtpërdrejt në këtë proces, të mbrojtjes që duhet t’ua ofrojmë personave që janë në Hagë, dhe jo të bëjmë veprime që duket se po bëjmë diçka. Prioritet duhet t’i jepet strategjisë, punës së anëtarëve të grupit punues dhe ekspertëve, bashkë me ekipet mbrojtëse”, shtoi ajo. Ndërkohë, shefja e Grupit Parlamentar të Lëvizjes Vetëvendosje, Arbërie Nagavci, njoftoi se deputeti Adnan Rrustemi do të jetë përfaqësuesi i këtij subjekti politik në grupin punues për hartimin e strategjisë për ish-krerët e UÇK-së. “Nga ana e Grupit Parlamentar të LVV-së do të jetë deputeti Adnan Rrustemi, i cili, në bashkëpunim me organizatën, do të japë kontribut maksimal në këtë grup punues”, deklaroi Nagavci. Nga ana tjetër, shefi i Grupit Parlamentar të Aleancës për Ardhmërinë e Kosovës, Besnik Tahiri, bëri të ditur se nga radhët e partisë së tij në këtë grup punues do të marrë pjesë deputeti Bekë Berisha. “Në grup do të përfaqësohet nga Bekë Berisha, deputet dhe luftëtar i jashtëzakonshëm e po ashtu kryetar i komisionit për AKI. Unë do të kërkoj brenda kryesisë që kuvendi të bëjë punën e vet si detyrim shtetëror dhe kombëtar prej këtu”, tha Tahiri. Vlen të kujtohet se më 16 shtator, në shkallën e parë të gjykimit, Dhomat e Specializuara shpallën dënime me gjithsej 81 vjet burgim për ish-krerët e UÇK-së: Hashim Thaçi u dënua me 25 vjet, Jakup Krasniqi me 25 vjet, Kadri Veseli me 18 vjet, kurse Rexhep Selimi me 13 vjet heqje lirie.