Operacioni “Infrastruktura” në Tiranë: Bllokohet magazina me dronë e pajisje përgjimi, pranga 23-vjeçarit që furnizonte protestuesit me llastiqe

Policia e Shtetit ka finalizuar me sukses operacionin e koduar “Infrastruktura”, duke çuar në arrestimin e një 23-vjeçari në Tiranë, i cili dyshohet se fshihej pas një rrjeti të gjerë kontrabande dhe furnizimi të paligjshëm. Gjatë ndërhyrjes, autoritetet kanë zbuluar një magazinë të mbushur me qindra pajisje elektronike, përgjuese, si dhe mjete që përdoreshin për të sulmuar efektivët e policisë dhe institucionet gjatë tubimeve të fundit. Në pranga ka rënë shtetasi O. M., 23 vjeç, banues në kryeqytet, i cili u kap në flagrancë nga Specialistët e Sektorit për Hetimin e Krimeve Ekonomiko-Financiare në rrugën “Tre Dëshmorët”. I riu po u shiste 30 llastiqe gjuetie të pajisura me sfera metalike disa prej pjesëmarrësve në protestat e ditëve të fundit, mjete këto që shërbenin për të goditur punonjësit e rendit. Pas këtij momenti, efektivët zhvilluan një kontroll të imtësishëm në një magazinë në pronësi të tij në rrugën “Kol Koçi”. Në ambientet e kësaj godine, forcat e rendit zbuluan mbi 450 artikuj të ndryshëm kontrabandë, për të cilët 23-vjeçari nuk posedonte asnjë lloj dokumentacioni ligjor. Inventari i sekuestruar përfshin 239 dronë të përmasave të ndryshme, 75 llastiqe gjuetie, sasi të konsiderueshme me sfera metalike, 17 Powerbank, 10 pajisje GPS për lokalizimin e automjeteve, 11 llamba LED, 3 drynë elektronikë me GPS, si dhe pajisje të avancuara zbulimi si ajo me antenë (RFGS Detector) dhe 5 aparatura K-68 për detektimin e kamerave dhe GPS-ve. Gjatë kontrollit u sekuestruan gjithashtu 3 palë syze me videoregjistrues, 7 pajisje Bluetooth dhe 8 Blackbox me kamera për makina, 1 kompresor, 8 elektrikë dore, 6 lazerë, 2 pajisje Xiaomi Smart Plug 2, 3 pajisje elektronike, 12 mausë kompjuterësh, 7 pajisje lojërash, 7 orë të llojit Watch 10 Pro Max, si dhe 8 çanta me hapje përmes gjurmëve të gishtërinjve. Të gjitha materialet procedurale tashmë i kanë kaluar Prokurorisë për veprat penale të “Tregtimit dhe transportimi të mallrave që janë kontrabandë”, “Kontrabandës me mallra të tjera”, “Fshehjes së të ardhurave”, “Mospagimit të taksave dhe tatimeve” dhe “Ushtrimit të një aktiviteti tregtar të paligjshëm”. Ndërkohë, hetimet vijojnë intensivisht për të zbardhur të gjithë skemën kriminale dhe për të identifikuar persona të tjerë që mund të jenë përfshirë në këtë veprimtari të paligjshme.