Vala e revoltës përfshin Shkodrën: Të rinjtë kërkojnë largimin e Ramës dhe përballjen e krerëve me drejtësinë

Iniciativa e të rinjve në Shkodër ka marrë sërish përmasa proteste, duke u solidarizuar hapur me lëvizjen studentore që prej shtatë ditësh po mban të përfshirë Tiranën. Gjatë tubimit, protestuesit kanë ngritur zërin përmes thirrjeve për largimin e menjëhershëm nga detyra të kryeministrit Edi Rama, teksa kanë kërkuar gjithashtu arrestimin e tij dhe të kryetarit të opozitës, Sali Berisha. Slogane si “Rama në burg”, “Berisha në burg” dhe “Rama jep dorëheqjen” kanë dominuar sheshin, ndërkohë që nuk kanë munguar as thirrjet e drejtuara strukturave rendore. “Hiqni kapelet”, kanë qenë fjalët e përdorura nga protestuesit, të cilët kanë ftuar efektivët e policisë që të braktisin detyrën dhe t'i bashkohen protestës së tyre.