Kreu i diplomacisë iraniane: Netanyahu po manipulon Uashingtonin drejt një konflikti të ri për interesat e tij personale

Ministri i Punëve të Jashtme të Iranit, Abbas Araghchi, ka hedhur akuza të forta ndaj kryeministrit të Izraelit, Benjamin Netanyahu, duke pretenduar se ky i fundit po tenton të angazhojë Shtetet e Bashkuara të Amerikës në një luftë të re me Teheranin thjesht për t'i shpëtuar drejtësisë dhe rrezikut të burgut. Reagimi i kryediplomatit iranian erdhi përmes një postimi në platformën sociale X, ku ai iu kundërvu deklaratave të fundit të kreut të qeverisë izraelite kundër vendit të jo. "Netanyahu po e shtyn SHBA-në drejt një konflikti të armatosur vetëm e vetëm për t'i ikur qelisë, duke mos i bërë aspak llogari pasojave shkatërruese që një gjë e tillë mund të sjellë si për Izraelin, ashtu edhe për vetë presidentin amerikan", u shpreh Araghchi. Më tej, duke iu referuar tensioneve të kaluara, ministri iranian theksoi se vendi i tij ka dalë më i fuqishëm nga sulmet e mëparshme që kishin për qëllim t'i jepnin fund regjimit. "Nëse dëshironi të provoni sërish fatin tuaj, vazhdoni. Por bëni kujdes, sepse edhe ne kemi çështje të hapura për të mbyllur", u shpreh ai. Sipas raportimeve të mediave rajonale, kryeministri izraelit Benjamin Netanyahu ka theksuar se zgjedhjet e 27 tetorit mbartin një peshë jetike, duke e futur çështjen e rrëzimit të regjimit iranian në doktrinën zyrtare të sigurisë kombëtare. Duke aluduar se kriza ekonomike në Iran po intensifikon pakënaqësinë qytetare dhe mund të ndezë valë të reja protestash, Netanyahu deklaroi: "Strategjia jonë parashikon një qasje të detajuar dhe të prerë për të sjellë rënien e sistemit aktual në Iran. Këto janë udhëzimet e qarta që u kam përcjellë strukturave të sigurisë".