Kryeministri Rama dënon dhunën në protesta: Vandalizmi nuk ul koston e jetesës e as nuk rrit pagat

Kryeministri i Shqipërisë, Edi Rama, ka reaguar me tone të ashpra ndaj thirrjeve për shkatërrim dhe akteve të dhunshme gjatë tubimeve të fundit në kryeqytet. Gjatë një fjalimi të mbajtur me strukturat e Policisë së Shtetit, kreu i ekzekutivit nëvizoi se veprimet vandale nuk përbëjnë asnjë zgjidhje për sfidat ekonomike dhe sociale me të cilat përballen qytetarët. Në fjalën e tij, Rama bëri me dije se dëmtimi i pronës publike dhe private—përfshirë djegien e pemëve, shkatërrimin e automjeteve dhe goditjen e bizneseve—nuk do të ndikojë në uljen e çmimeve, rritjen e rrogave apo sigurimin e strehimit me kosto më të përballueshme. Sipas kryeministrit, gjuha e përdorur në rrjetet sociale për të nxitur shkatërrimin e Tiranës nuk mund të përfaqësojë të ardhmen. Ai mbrojti me argumente financiare kontributin e zhvillimit urban, duke marrë shembull projektet ndërtimore në kryeqytet: “Nuk e dinë se sa taksa paguhen për ta ndërtuar atë godinë, nuk e dinë që me taksat e asaj godine që del për strehim, ndërtohen pesë shkolla të reja. Është 3 milion e gjysmë euro taksa dhe 3% shkon për strehim, që janë 18 apartamente për njerëzit që kanë nevojë për një strehim të përballueshëm dhe social”, u shpreh Rama. Më tej, ai sqaroi se të ardhurat nga taksat e ndërtimit janë burimi kryesor për financimin e infrastrukturës arsimore dhe urbane në Tiranë, si shkollat, kopshtet, çerdhet, rrugët dhe ndriçimin publik. Rama dënoi ashpër sulmet ndaj forcave të rendit dhe shprehi solidaritetin e tij të plotë me efektivët e lënduar: “Familjet tuaja meritojnë solidaritet e respekt”, deklaroi ai, duke pyesur retorikisht protestuesit se me çfarë do t'i zëvendësonin këto investime, “me gur apo me syrin e një polici të dëmtuar”. Reagimi i kreut të qeverisë vjen pas zhvillimit të protestës së gjashtë me radhë të organizuar nga studentët në Shqipëri.