Maurizio Sarri shpërthen pas sfidës me Milanin: Na mohuan penallti, me këtë gjyqtar përsëritet e njëjta histori

Trajneri i Atalantës, Maurizio Sarri, ka shprehur zhgënjimin e tij të thellë pasi skuadra nukarriti të siguronte të paktën një barazim në transfertën ndaj Milanit, pavarësisht përpjekjeve për të përmbysur rezultatin në minutat e fundit të takimit. Në prononcimin e tij pas përfundimit të ndeshjes, tekniku nuk ka kursyer kritikat e ashpra dhe polemikat ndaj vendimeve të arbitrit kryesor, Kifi, duke hedhur hije dyshimi mbi mënyrën e gjykimit. “Kishim bindjen se po t'i mbyllnim në zonën e lor qoftë edhe për 20 sekonda radhazi, do të mund ta rihapnim sfidën. Gjatë fraksionit të parë na kushtuan shtrenjtë gabimet tona dhe një sërë episodesh fatkeqe, përfshirë këtu mosreagimin e sistemit VAR për ndërhyrjen e De Uinter, e cila mund të vlerësohej si prekje e topit me dorë, njësoj siç u veprua në dy rastet tona. Megjithatë, lojtarët luftuan deri në sekondën e fundit dhe zhvilluam një gjysmë ore në nivele shumë të larta”, u shpreh fillimisht Sarri. Sipas trajnerit, mungesa e agresivitetit në pjesën e parë ishte fatale, ndërsa shtoi se kishte ardhur koha për të reflektuar mbi mundësitë e humbura, sidomos kur skuadra kishte shansin e artë për të barazuar shifrat në minutat e fundit. “Në pjesën e parë nuk treguam agresivitetin e duhur dhe e pësuam, së bashku me rrethanat e pafavorshme që na shoqëruan. Është vërtet për të ardhur keq, pasi mundësinë për golin e barazimit 3-3 e patëm gjashtë minuta para fundit. Me pesë minuta shtesë, në total do të ishin 11 minuta lojë dhe duke parë vrullin tonë, mund të kishim arritur diçka më shumë se një humbje. Është keqardhje e madhe, por për të bërë një paraqitje të tillë në 'San Siro', duhet vetëbesim që atë gjysmë ore fantastike ta zgjasim për një periudhë më të gjatë”, theksoi ai. Në mbyllje të analizës së tij, kreu i stafit teknik të Atalantës u ndal sërish te vendimet e arbitrazhit, duke lënë të kuptohet se ka një precedent të pakëndshëm me kryesorin e kësaj sfide. “Për një periudhë të caktuar të ndeshjes fati na anashkaloi plotësisht. Dy gjuajtje nga distanca përfunduan te mbrojtësit tanë, ndërsa një episod i ngjashëm në zonën kundërshtare u kalua në heshtje nga të gjithë. Fatkeqësisht, situata të tilla përsëriten shpesh kur në fushë është gjyqtari Kifi”, përfundoi trajneri i Atalantës.