Tensionet në Tiranë, Peleshi fton në bashkëbisedim: Të lëmë mënjanë mllefin dhe të punojmë për vendin

Kryetari i Kuvendit, Niko Peleshi, ka reaguar ashpër ndaj akteve të dhunës të regjistruara gjatë tubimeve të fundit në vend, duke theksuar se mësymja ndaj institucioneve dhe dëmtimi i pasurisë publike e asaj private nuk kanë asnjë lidhje me lirinë e ligjshme për të protestuar. Nëpërmjet një postimi në rrjetet sociale, Peleshi ka vlerësuar se brezi i ri është në të drejtën e tij të kërkojë standarde më të larta dhe të synojë një të ardhme të njëjtë me moshatarët evropianë, por ka shtuar se aktet e dhunshme mbeten rruga e gabuar për të shtruar kërkesat qytetare. Duke iu referuar qëndrimit zyrtar të Komisionit Evropian mbi protestat gjashtëditore në kryeqytet, kreu i Kuvendit përsëriti se shkatërrimi i pronës dhe sulmet ndaj shtetit nuk përfaqësojnë në asnjë mënyrë kauzën apo të drejtat e studentëve. Në vijim të mesazhit të tij, Peleshi ka lëshuar një thirrje urgjente për hapjen e kanaleve të komunikimit dhe dëgjimin e ndërsjellë mes akterëve politikë dhe shoqërorë, duke kërkuar angazhim pa paragjykime. "Le të ulemi me njëri-tjetrin. Pa paragjykim, pa mllef. Çdo orë që kalon e bën më të vështirë dialogun", ka shkruar ai, duke vënë theksin te rëndësia e mbajtjes hapur të urave të komunikimit edhe në kushtet e mosmarrëveshjeve. Në përmbyllje të reagimit të tij, kryeparlamentari ka bërë thirrje për solidaritet dhe bashkëpunim të ngushtë në shërbim të interesave kombëtare. "T’i japim dorën njëri-tjetrit sot! Jemi për një qëllim. Për Shqipërinë", përfundon thirrja e tij.