Sulmi në Ibër-Lepenc: Nesër mbahet seanca gjyqësore në Pallatin e Drejtësisë

Të hënën, në orën 13:15, Pallati i Drejtësisë në Prishtinë do të jetë nikoqir i seancës gjyqësore lidhur me sulmin terrorist të ndodhur më 29 nëntor 2024 në kanalin e Ibër-Lepencit, në fshatin Varagë të Zubin-Potokut. Prokuroria Speciale e Kosovës ka ngritur aktakuzë ndaj tre të pandehurve më 9 dhjetor 2025. Të gjithë ata ngarkohen me veprën penale të armëmbajtjes pa leje, ndërsa dy prej tyre, Jovan dhe Dragisha Viqentijeviq, përballen gjithashtu me akuza të rënda që përfshijnë rrezikimin e rendit kushtetues përmes shkatërrimit apo dëmtimit të instalimeve dhe pajisjeve publike, kryerjen e veprës terroriste dhe spiunazhin. Sipas dosjes së prokurorisë, të akuzuarit janë përgjegjës për sulmin që shkaktoi dëme materiale të konsiderueshme në infrastrukturën kritike ujore dhe energjetike të vendit tonë, siç është sistemi i Ibër-Lepencit.