Në qendër të vëmendjes: Emily Ratajkowski shkëlqen në tapetin e kuq krah regjisorit francez

Modelja e njohur Emily Ratajkowski ka marrë vëmendjen e të gjithëve gjatë paraqitjes së saj në mbrëmjen gala të Muzeut të Akademisë në Los Angeles, e cila u mbajt të shtunën. Ajo u shfaq në tapetin e kuq në krah të partnerit të saj, regjisorit Romain Gavras. E veshur me një fustan të kuq, të ngushtë pas trupit që theksonte linjat e saj, 35-vjeçarja dukej tejet elegante. Veshja e saj spikaste me mëngë të përdredhura dhe detaje të rrudhosura në zonën e belit. Nga ana tjetër, 45-vjeçari Romain Gavras u paraqit i veshur me një kostum klasik të zi, të kombinuar me këmishë të bardhë dhe kravatë. Dyshja dukej mjaft e afërt dhe në humor të mirë teksa pozonte për fotografët në prani të shumë personaliteteve të tjera të njohura. Regjisori francez, i njohur edhe për lidhjet e tij të mëparshme me këngëtaret e njohura Dua Lipa dhe Rita Ora, nä dukje po shijon romancën e re. Lidhja mes modeles dhe regjisorit nisi të përflitej në muajin nëntor të vitit të kaluar, ndërsa daljet e tyre publike po bëhen gjithnjë e më të shpeshta. Pak javë më parë, ata u fotografuan duke shëtitur dorë për dore dhe duke shkëmbyer puthje në rrugët e Romës gjatë një udhëtimi romantik. Kjo paraqitje e fundit në Los Angeles duket se konfirmon përfundimisht lidhjen e fortë dhe afërsinë mes çiftit, duke tërhequr sërish vëmendjen e mediave dhe publikut.