Krijohen sfidat e mëdha në arsim: Dy gjimnaze në një ndërtesë lënë nxënësit pa kabinete informatike

Nxënësit e gjimnazit “Ahmet Gashi” në kryeqytet po ndjekin mësimin e informatikës pa pasur mundësi që njohuritë teorike t'i kthejnë në praktikë, shkaku i mungesës së kabineteve të pajisura me kompjuterë. Ky ngërç u krijua pas vendosjes së gjimnazit “Eqrem Çabej” në të njëjtën ndërtesë, veprim që la pas vetëm dy kabinete të mbyllura të informatikës dhe reduktim drastik të hapësirave për orët praktike të lëndëve të tjera. Sipas mësimdhënësve, kjo situatë pengon rëndë përvetësimin e aftësive digjitale nga ana e të rinjve, ndërkohë që nga ana komunale paralajmërohet një riorganizim i ambienteve vetëm pasi të përfundojnë projektet për ndërtimin e shkollave të reja. Në këtë institucion arsimor të Prishtinës, teknologjia mësohet kryesisht në letër dhe pa mundësi për ushtrime praktike. Dy kabinetet e dikurshme të informatikës të gjimnazit “Ahmet Gashi” tashmë janë shuar, ndërsa orët e kësaj lënde mbahen në sallat e zakonshme të mësimit, duke u mbështetur kryesisht te përdorimi i projektorëve. Kjo gjendje pasoi vendimin e ndërmarrë nga Drejtoria Komunale e Arsimit, e cila prej tri vitesh ka bashkuar dy gjimnaze nën një çati të vetme. Për trupën pedagogjike, ky deficit hapësinor nuk përbën thjesht një ngushtësi fizike, por një pengesë reale për avancimin e nxënësve në epokën digjitale. “Në një kohë kur tregu i punës po avancon vazhdimisht, sidomos në fushën e teknologjisë dhe përdorimit të inteligjencës artificiale, ne përballemi me sfida elementare, sepse nuk posedojmë fare kabinet të informatikës. Lënda e informatikës zhvillohet në klasë të zakonshme, njësoj sikurse lëndët e tjera”, u shpreh Gentijana Loshaj, profesoreshë e informatikës. Sipas saj, shkolla ka mbetur totalisht e pafuqishme për t'u siguruar nxënësve kushtet minimale të punës për zhvillimin e kompetencave digjitale. “Sa u përket kurseve dhe trajnimeve private që ata i ndjekin, janë të përgatitur, por ne si shkollë nuk mund të ofrojmë asgjë. Dihet se të gjitha mësimet shtesë kanë kosto financiare për prindërit, e cila mund të kalojë 100 euro në muaj”, shtoi Loshaj. Në hapësirat ku dikur zhvillonte procesin vetëm gjimnazi “Ahmet Gashi”, tashmë zhvillojnë mësim nxënësit e dy shkollave. Gjimnazi i parë numëron 30 paralele, kurse gjimnazi “Eqrem Çabej” shton edhe 18 të tjera, duke çuar shifrën në 48 paralele që funksionojnë përmes sistemit me dy ndërrime. Drejtoria e shkollës thekson se vendimi për këtë bashkim ka mbingarkuar tej mase objektin, duke privuar nxënësit nga kushtet e nevojshme për punë praktike jo vetëm në TIK, por edhe në fusha të tjera. “Tash, me ardhjen e tyre, është ngushtuar hapësira për zhvillimin e procesit mësimor, posaçërisht për lëndët e TIK-ut, ku kemi mungesë të kabineteve të informatikës dhe, si mësimdhënës të TIK-ut, orën e realizojmë vetëm me projektor. Domethënë, ne i kemi pasur dy kabinete, tani nuk e kemi asnjë kabinet. Pastaj kemi nevojë për kabinet të muzikës, të artit figurativ, të cilat tash nuk i kemi. Nuk kemi as kabinete të fizikës, kimisë dhe biologjisë, të cilat dikur shkolla i ka pasur”, tha drejtori. Megjithatë, problematika e mungesës së hapësirave shkollore prek edhe institucione të tjera arsimore në kryeqytet. Këtë situatë e pohon edhe drejtori i Arsimit në Prishtinë, Arianit Elshani. “Jemi duke punuar dhe aktualisht janë disa vendpunishte të hapura për ndërtimin e shkollave të reja. Fatmirësisht, një zgjidhje konkrete do të mundësojë lirimin e hapësirave në Tophane, pasi një pjesë e nxënësve do të bartet në shkollën e re. Kjo do të na mundësojë riorganizimin e hapësirave ekzistuese dhe zhvendosjen e fëmijëve në ambiente të tjera shkollore”, deklaroi Elshani. Derisa autoritetet komunale të finalizojnë projektet dhe të krijojnë kushtet e premtuara, nxënësit e gjimnazit “Ahmet Gashi” do të detyrohen të vazhdojnë të marrin njohuri rreth teknologjisë dhe informatikës kryesisht përmes skemave teorike.