“Jam 22 vjeç, s'di si formohet një qeveri!” – Rrëfimi prekës i studentes që u bë simbol i protestave në Tiranë

Samanda Toçka ka qenë e ftuar në “Grida Duma Podcast”, ku ka ndarë një rrëfim tejet emocional mbi sfidat e përditshmërisë, familjen e saj të shpërndarë në shtete të ndryshme të botës dhe zhgënjimin e thellë të një brezi të ri që synon të ndërtojë jetën në Shqipëri. “Ne nuk duam të shkatërrojmë asgjë! Ne thjesht nuk jemi dëgjuar kurrë!”, thekson ajo, duke shpërthyer në lot teksa përshkruan revoltën e moshatarëve të saj që ngrihen për një jetë më dinjitoze dhe mundësi reale. E reja 22-vjeçare sjell në vëmendje realitetin e hidhur të mbijetesës në kryeqytet, ku nga një pagë mujore prej 500 mijë lekësh të vjetra, plot 400 mijë i dedikohen pagesës së qirasë. “Jam e punësuar shtatë ditë në javë dhe e kisha të pamundur të takoja familjen time”, tregon ajo, duke ngritur një shqetësim madhor për pamundësinë e një të riu për të siguruar një banesë me këto të ardhura. Gjatë bisedës, Samanda ndalet edhe te pengesat për të siguruar një vend pune në institucionet publike, ku, sipas saj, kriteri i meritokracisë dhe diplomës shpesh zëvendësohet nga lidhjet personale dhe nepotizmi. “Jam 22 vjeç dhe nuk kam idenë se si funksionon procesi i formimit të një qeverie! Asnjë gjë nuk mund të fshihet më!”, shprehet ajo, duke përcjellë zërin e një brezi që kërkon me ngulm vëmendje dhe llogaridhënie. Ky është një dëshmi intime që shkon përtej pamjeve të protestave, duke prekur ëndrrat e lëna në gjysmë, sakrificat familjare dhe vullnetin e fortë për të mos u detyruar të braktisë atdheun.