Trazira të paprecedenta në Francë, Macron paralajmëron ndëshkim të rreptë: Përgjegjësit do të paguajnë shtrenjtë

Presidenti i Francës, Emmanuel Macron, i është drejtuar kombit përmes një fjalimi televiziv urgjent, pas valës së protestave të dhunshme që lanë pas qindra të plagosur dhe dëme të konsiderueshme materiale në mbarë vendin. Kreu i shtetit francez ka dënuar ashpër aktet e vandalizmit dhe plaçkitjet, duke premtuar një përgjigje të prerë dhe pakompromis nga ana e institucioneve shtetërore. "Po ju flisni sonte në një çast tejet delikat dhe serioz. Të shtunën, elementë radikalë të së majtës ekstreme, të mbështetur nga grupe kriminelësh, sulmuan dyqane dhe shkatërruan pronat publike," u shpreh Macron në hyrje të fjalimit të tij. Ai shtoi se e gjithë Franca ndan ndjenjën e "zemërimit dhe turpit", duke nënvizuar se asnjë rrethanë nuk mund të shërbejë si alibi për dhunën e shfaqur. "Pse u dogj bashkia në Limozh? Si është e mundur të arrihet deri këtu? Asgjë nuk e arsyeton dhe asgjë nuk e justifikon këtë sjellje", deklaroi ai. Macron vuri nё dukje se forcat e sigurisë, pavarësisht shkallës së lartë të profesionalizmit, u gjetën përballë një dhune të jashtëzakonshme. "I kam kërkuar Ekzekutivit të vlerësojë me imtësi operacionet e inteligjencës dhe do të ketë transparencë maksimale. Hetimet do të zhvillohen me vendosmërinë më të madhe," shtoi ai. Ndërkohë, sa i përket sistemit të drejtësisë, ai theksoi se gjyqtarët veprojnë në emër të popullit dhe janë të vetëdijshëm për pritshmëritë e qytetarëve. "Ata që shkaktuan shkatërrime duhet të mbajnë përgjegjësi financiare, ata që plaçkitën janë të detyruar të dëmshpërblejnë dëmet, ndërsa ata që tentuan të përmbysin Republikën do të përballen me pasojat e plota ligjore." Lideri francez bëri me dije gjithashtu se do të ofrohet mbështetje financiare për sipërmarrësit e prekur, ndërsa konfirmoi se janë ndërmarrë hapa ndërkombëtarë për të garantuar stabilitetin e furnizimit me energji. "Këto masa duhet të reflektohen drejtpërdrejt te çmimet. E di mirë se qytetarët tanë kërkojnë rezultate konkrete. Rinjtë tanë po përjetojnë një ankth të thellë për të ardhmen e tyre dhe integrimin në shoqëri. Unë i kuptoj plotësisht nxënëset, nxënësit dhe studentët. Zëri i tyre është prioritet në agjendën time dhe duhet të dëgjohet. Misioni ynë është i dyfishtë: të kuptojmë shqetësimet e tyre, por njëkohësisht të garantojme pakompromis respektimin e rendit republikan", tha Macron. Në këtë linjë, ai përmendi se prefektët kanë autoritetin të ndalojnë tubime të caktuara dhe u bëri thirrje të gjitha akterëve politikë që të distancohen qartë nga dhuna. "Vendi kërkon sundim ligji dhe qetësi, e jo përshkallëzim të mëtejshëm të situatës. Nuk mund t'i kërkojmë rinisë të ketë besim në të ardhmen nëse nuk uhemi fillimisht për të dialoguar", u shpreh ai. Macron përsëriti se dhuna është e pajustifikueshme dhe premtoi hetime transparente lidhur me veprimet e policisë gjatë ndërhyrjeve. Fjalimi i presidentit erdhi pas një mbledhjeje krize me kabinetin e tij, e cila pasoi valën e sulmeve ndaj institucioneve publike dhe bashkive në disa qytete të vendit. Si pasojë e protestave kundër shtrenjtimit të jetesës, mbi 2000 persona janë vënë në pranga në të gjithë territorin francez. Këto shifra u konfirmuan në orët e mëngjesit nga Ministri i Brendshëm, Laurent Nunez, pas përleshjeve të njëpasnjëshme, zjarrvënieve dhe akteve të grabitjes. Numri i bizneseve të dëmtuara llogaritet në qindra. Alexandre Bompard, kryetar i Federatës së Tregtisë dhe Shpërndarjes dhe njëherësh drejtor i "Carrefour", bëri të ditur se janë dëmtuar 1500 dyqane, me dëme financiare që kapin shifrën e qindra miliona eurove. Të dielën, qindra qytetarë u tubuan sërish në sheshin Place de la République në Paris, nën vëzhgimin e forcave policore. Pas incidenteve të herëpashershme, policia përdori gaz lotsjellës, ndërsa grupe të vogla protestuesish tentuan t'u vinin zjarr biçikletave.