Prishtina i shkakton Bashkimit humbjen e parë sezonele në një përballje dramatike

Sigal Prishtina ka regjistruar një fitore mjaft të rëndësishme dhe dramatike në udhëtim, duke mposhtur Bashkimin me rezultat të ngushtë 79-77, në kuadër të javës së pestë të Superligës së Kosovës në basketboll. Skuadra nga Prizreni arriti të këndellej gjatë dy çerekëve të mesëm, duke përmbysur shifrat dhe kaluar në epërsi, mirëpo në momentet vendimtare të ndeshjes, bardhekaltrit treguan më shumë maturi e përqendrim për të siguruar triumfin. Një nga faktorët kryesorë që ndikoi në këtë rezultat ishin gjuajtjet e lira, të cilat u shndërruan në pikën më të dobët të skuadrës vendase gjatë gjithë takimit. Kjo është disfata e parë për Bashkimin në këtë edicion pas një serie prej katër fitoresh radhazi, ndërkohë që Prishtina tashmë regjistron tri fitore krahas dy humbjeve në bilancin e saj.