Goditje e rëndë për Barcelonën: Dëmtohen dy mbrojtësit kyç para superpërballjes me kampionin e Evropës

Në momentin kur gjithçka dukej se po shkonte sipas planit për skuadrën katalunase, një lajm i papritur ka tronditur taborin e Barcelonës në prag të sfidës më sfiduese të edicionit. Klubi blaugrana do të masë forcat të martën me kampionin evropian, PSG-në, mirëpo ky duel vjen me pasoja të rënda pas konfirmimit të lëndimeve të dy prej mbrojtësve kryesorë të skuadrës. Bëhet fjalë për Eric Garcian dhe Jules Kounden, të cilët kanë pësuar dëmtime gjatë triumfit kundër Real Betisit dhe zyrtarisht do të mungojnë në përballjen ndaj gjigantit francez, siç ka bërë të ditur klubi përmes një njoftimi zyrtar. Sipas komunikatës së klubit, situata e Eric Garcias paraqitet më shqetësuese. Mbrojtësi polivalencial ka pësuar një tërheqje muskulore që pritet ta mbajë jashtë fushave të blerta për afro një muaj. “Lojtari i ekipit të parë, Eric Garcia, ka pësuar një lëndim muskulor në muskulin rectus femoris të kofshës së djathtë. Koha e rikuperimit vlerësohet të jetë nga tri deri në katër javë”, thuhet në njoftimin e lëshuar nga klubi. Ky zhvillim përbën një alarm të kuq për trajnerin dhe stafin teknik, duke marrë parasysh se skuadra po vuan tashmë edhe nga mungesa e afatgjatë e Andreas Christensenit për shkak dëmtimi. Përveç ndeshjes me PSG-në, Garcia do të detyrohet të humbasë edhe supersfidën e radhës ndaj Real Madridit, pasi rikthimi i tij parashikohet vetëm nga mesi i muajit të ardhshëm, duke lënë një boshllëk të madh si në krahun e djathtë ashtu edhe në qendër të prapavijës, ku po luante krah Pau Cubarsit. Në krahun tjetër, situata rreth Jules Koundes duket më optimiste, pasi dëmtimi i francezit nuk paraqitet në shkallë alarmante, duke bërë që ai të mungojë zyrtarisht vetëm për duelin e së martës kundër francezëve. “Lojtari i ekipit të parë, Jules Kounde, ka pësuar një ndrydhje të kyçit të këmbës së majtë dhe do ta humbasë ndeshjen kundër PSG-së. Gatishmëria e tij për El Clasicon e së dielës kundër Real Madridit do të varet nga ecuria e rikuperimit”, ka sqaruar klubi. Treneri Hansi Flick mban shpresa të plota se Kounde do t'ia dalë të rikuperohet në kohë për 'El Clasico', në të kundërt ai do të detyrohet të improvizojë me skema të reja në repartin defensiv. Në një skenar të tillë emergjent, Joao Cancelo pritet të pozicionohet në krahun e djathtë, kurse Xavi Espart mund të marrë vendin në krahun e kundërt. Ndërkaq, Gerard Martin dhe Pau Cubarsi mbeten alternativat e vetme natyrale në qendër, ndonëse mesfushori Frenkie de Jong ka filluar të stërvitet rregullisht edhe në rolin e mbrojtësit qendror.