Kryeministri Rama në shënjestrën e Brukselit, eurodeputeti Rihard Kols: Tirana po dështon në provën e demokracisë

Eurodeputeti Rihard Kols, njëkohësisht anëtar i Komisionit për Punët e Jashtme në Parlamentin Europian (AFET), ka lëshuar kritika të ashpra ndaj ekzekutivit shqiptar, duke dënuar përdorimin e dhunës policore ndaj protestuesve dhe medias. Sipas zyrtarit europian, ekziston një kontradiktë e thellë mes imazhit që Shqipëria projekton në skenën ndërkombëtare si partnere e besueshme e NATO-s dhe kampione në procesin e integrimit europian, dhe realitetit të brendshëm ku autoritetet përdorin forcën ndaj qytetarëve. Kols ka dënuar ashpër faktin se efektivët e rendit janë përfshirë në përleshje me studentë dhe të mitur, duke përdorur mjete shtrënguese si plumba gome, gaz lotsjellës dhe granata trullosëse, ndërkohë që gazetarët dhunohen gjatë ushtrimit të misionit të tyre profesional. Duke iu kundërvënë tezës së ngritur nga kryeministri Edi Rama se trazirat janë rezultat i intrigave nga aktorë të jashtëm, eurodeputeti e ka cilësuar këtë argument si një fyerje të hapur ndaj gjeneratës së re. “Fajësimi i ‘ndërhyrjes së huaj’ për zemërimin e të rinjve shqiptarë ndaj korrupsionit dhe pandëshkueshmërisë është fyerje ndaj tyre”, ka theksuar Kols në reagimin e tij. Ai ka kujtuar se organizatat ku Shqipëria synon integrimin e plotë, si Bashkimi Europian dhe NATO, bazohen mbi parimet e demokracisë, shtetit të së drejtës dhe lirisë qytetare, parime të cilat sipas tij po shkelen përmes goditjes së të rinjve dhe medias. Në përfundim të reagimit të tij, eurodeputeti ka kërkuar hetimin e menjëhershëm të çdo episodi të dhunës nga ana e strukturave të rendit, duke nënvizuar se qytetarët shqiptarë duhet të gëzojnë lirinë e plotë për të përcaktuar fatin e tyre.