Tragjedi në bazën ushtarake kanadeze: Zjarri masiv gjatë stërvitjes lë pas viktima dhe dhjetëra të plagosur

Një ngjarje e rëndë ka tronditur Kanadaja, pasi një zjarr masiv ka shpërthyer gjatë një stërvitjeje ushtarake me municion luftarak në Bazën Wainwright, në rajonin e Albertës, duke lënë pas dhjetëra të plagosur dhe disa viktima të raportuara. Incidenti tragjik ndodhi të shtunën, teksa po zhvillohej një ushtrim në një nga komplekset aktive ushtarake të vendit. Flakët e fuqishme, të cilat u përhapën me shpejtësi të jashtëzakonshme për shkak të erërave të forta që në disa zona të Albertës arritën shpejtësi deri në 100 kilometra në orë, shkaktuan dëme të mëdha dhe panik. Kryeministri kanadez, Mark Carney, ka konfirmuar ngjarjen, duke e cilësuar atë si një situatë shumë serioze. Sipas të dhënave, alarmi u dha rreth orës 16:00 me kohën lokale. Ndërkohë që shkaqet e sakta mbeten ende për t'u përcaktuar, raportimet sugjerojnë dyshimet se gjatë stërvitjes mund të jetë goditur një pus gazi ose një tubacion. Lidhur me bilancin tragjik, raportimet e para nga media të ndryshme vendase flasin për të paktën shtatë persona që kanë humbur jetën, referuar burimeve ushtarake anonime. Megjithatë, Departamenti i Mbrojtjes Kombëtare ende nuk e ka zyrtarizuar këtë shifër të viktimave. Në një prononcim zyrtar, një zëdhënës i Ministrisë së Mbrojtjes ka bërë të ditur se hetimet intensive janë duke vazhduar për të zbardhur rrethanat e plota, duke shtuar se deri në këtë fazë nuk ka asnjë shenjë apo tregues se ngjarja mund të ketë lidhje me ndonjë akt terrorist.