Brukseli reagon ashpër ndaj tensioneve në Shqipëri: Dhuna është e papranueshme, reagimi i shtetit të jetë proporcional

Komisioni Evropian ka ngritur shqetësimin e tij lidhur me tensionimin e situatës dhe përshkallëzimin e protestave në Shqipëri. Institucioni i lartë i Bashkimit Evropian ka dënuar fuqishëm aktet e dhunës të regjistruara në Tiranë dhe në qytete të tjera të vendit, duke kërkuar njëkohësisht që reagimi i autoriteteve shtetërore të bazohet rreptësisht te ligji dhe të jetë proporcional. Përmes një deklarate zyrtare të bërë publike këtë të diel, më 18 tetor, Komisioni Evropian ka shprehur qëndrimin e prerë kundër çdo akti zjarrvënieje, sulmesh ndaj objekteve të institucioneve shtetërore, si dhe dëmtimit të pronësisë publike apo private. “Dhuna nuk ka vend në një shoqëri demokratike”, theksohet qartë në dokumentin e Brukselit, ku bëhet thirrje që individët përgjegjës për këto akte të mbajnë përgjegjësi ligjore dhe të përballen me drejtësinë përmes proceseve të rregullta. Nga ana tjetër, Brukseli ka sjellë në vëmendje se liria e tubimit dhe e shprehjes përbëjnë të drejta fundamentale dhe vlera kyçe evropiane, të cilat duhet të respektohen dhe të ushtrohen domosdoshmërisht në rrugë paqësore. Komisioni Evropian ka shprehur gjithashtu mirëseardhjen për gatishmërinë e autoriteteve shqiptare në mbrojtjen e së drejtës qytetare për të protestuar, duke vënë theksin te nevoja e ruajtjes së këtyre lirive gjatë menaxhimit të kësaj periudhe të ndjeshme. Në fund të mesazhit të tij, Brukseli e ka ndërlidhur këtë situatë me rrugëtimin e Shqipërisë drejt Bashkimit Evropian. Ai ka nënvizuar se në një vend kandidat që synon anëtarësimin dhe që ka shënuar hapa para në këtë drejtim, çdo lloj pakënaqësie duhet të gjejë zgjidhje ekskluzivisht përmes dialogut konstruktiv dhe paqësor.