Trazirat në Francë, Donald Trump lëshon alarmin: Mbyllni kufijtë para se të jetë vonë!

Presidenti amerikan, Donald Trump, ka reaguar ashpër ndaj situatës së tensionuar dhe protestave masive që kanë përfshirë Francën, duke dhënë një mesazh të fortë për autoritetet e këtij vendi. “Franca është në flakë! Imigracioni i njerëzve nga një botë krejtësisht tjetër, njerëz që mbajnë urrejtje në zemrat e tyre, ka shkatërruar atë që dikur ishte një vend i madh”, ka shkruar Trump në platformën Truth, ndërsa ka shtuar më tej: “Mbyllni kufijtë dhe rimerrni kontrollin, para se të jetë tepër vonë!” Reagimi i kreut të Shtëpisë së Bardhë vjen në një kohë kur situata në terren ka dalë jashtë kontrollit. Ministri i Brendshëm, Laurent Nunez, bëri të ditur se më shumë se 2,000 persona janë vënë në pranga gjatë dhe pas protestave mbarëkombëtare për koston e jetesës, të cilat u bashkuan nga lëvizja e “Jelekëverdhëve”, sindikatat, studentët dhe fermerët. Sipas të dhënave të publikuara në rrjetin social X nga Nunez, mbi 600 efektivë policie, xhandarë dhe zjarrfikës kanë mbetur të plagosur gjatë përleshjeve të dhunshme, të shoqëruara me zjarrvënie dhe plaçkitje të përhapura. Ai theksoi se numri i të lënduarve mbetet i përkohshëm dhe se hetimet vazhdojnë për identifikimin e autorëve. Demonstratat e së shtunës mblodhën rreth 550,000 qytetarë në shkallë vendi, përfshirë 110,000 vetëm në kryeqytet, sipas shifrave zyrtare të Ministrisë së Brendshme, ndërsa organizatorët pretendojnë se pjesëmarrja ka arritur në 800,000 veta. Megjithëse marshimi kryesor në Paris kaloi kryesisht i qetë, dhuna shpërtheu në zonat periferike të disa qyteteve. Pasojat ekonomike dhe materiale janë gjithashtu shkatërruese. Alexandre Bompard, drejtor ekzekutiv i Carrefour dhe president i Federatës së Tregtisë dhe Shpërndarjes, u shpreh se rreth 1,500 biznese të shitjes me pakicë janë dëmtuar rëndë, me dëme që llogariten në qindra miliona euro. Në Limoges, një zjarr i fuqishëm shkatërroi godinën historike të bashkisë, ndërsa dyqane dhe ndërtesa u grabitën e u dëmtuan në qendra të rëndësishme urbane si Marseja, Lioni dhe Bordeaux. Tragjikisht, një demonstrues ndërroi jetë pasi pësoi arrest kardiorespirator në Boulevard Magenta në Paris, ndërsa mediat raportuan se një 17-vjeçar humbi njërën dorë nga goditja e një granate policie në Saint-Etienne. Kryetari i Bashkisë së Parisit, Emmanuel Gregoire, njoftoi krijimin e një grupi pune emergjent për të ndihmuar bizneset e dëmtuara dhe për të lehtësuar procedurat administrative. Në një letër të hapur, ai dënoi ashpër dhunën, duke theksuar se asnjë zemërim apo kërkesë nuk mund të përligjë sulmet ndaj atyre që e mbajnë qytetin gjallë çdo ditë. Nga ana e tij, kryeministri Sebastien Lecornu pritet të drejtojë një takim ndërministror për të adresuar krizën ekonomike, ndjekjet penale dhe çështjet e sigurimeve. Ai do të takohet gjithashtu me krerët e bashkive të Parisit, Marsejës dhe Lionit, të cilët kanë kërkuar llogari lidhur me burimet e angazhuara policore dhe menaxhimin e trazirave. Ndërkohë, Yael Braun-Pivet, presidente e Asamblesë Kombëtare, po shqyrton mundësinë e ngritjes së një komisioni hetimor parlamentar për ngjarjet.