Valë vjedhjesh në objektet fetare të Tetovës: Policia kap në kohë rekord autorin e dyshuar

Autoritetet policore të Tetovës kanë vënë në pranga një 35-vjeçar nga fshati Jellovjan, pasi dyshohet se është autori i disa tentativave për vjedhje dhe një vjedhjeje të regjistruar gjatë dy ditëve të fundit në disa objekte fetare të qytetit. Raste të tilla alarmuan institucionet e rendit, të cilat reaguan menjëherë pas denoncimeve të bëra më 17 tetor 2026 në SPB Tetovë. Sipas informacioneve zyrtare nga policia, incidentet janë shënuar në disa lokacione të ndryshme. Në xhaminë “Firdeus”, që ndodhet në rrugën “Jashtë Vardarit”, gjatë periudhës 16-17 tetor, një person ende i paidentifikuar në atë moment kishte përdorur forcën fizike për të thyer dritaren e bodrumit, duke tentuar të depërtojë brenda, para se të largohej duarbosh. Një ngjarje e ngjashme ndodhi edhe në “Xhaminë e Madhe” në rrugën “Çarshia e Epërme”, ku rreth orës 05:30 një person hyri brenda dhe tentoi të gjente çelësin, duke dëmtuar më pas derën me një mjet të fortë metalik dhe duke u larguar nga vendi i ngjarjes. Po ashtu, në xhaminë “Eski” në rrugën “Probishti”, personi përgjegjës A.B. (38) nga Tetova ka njoftuar autoritetet se persona të panjohur kishin dëmtuar kasafortën metalike, e cila ishte zhvendosur dhe fshehur poshtë një karrigeje. Falë veprimeve të shpejta dhe operacionale në terren, efektivët e policisë së SPB Tetovë arritën që më 17.10.2026, rreth orës 12:30, në rrugën “Boris Kidriç” në Tetovë, të ndalojnë dhe të privojnë nga liria shtetasin D.S. (35). Ai dyshohet seriozisht për veprat penale “Vjedhje e rëndë” dhe “Vjedhje e rëndë në tentativë”, vepra të sanksionuara me nenin 235 të Kodit Penal. Nga policia bëhet e ditur se pasi të dokumentohet plotësisht ngjarja, ndaj tij do të ngrihet kallëzimi përkatës penal.