Kushtet e vështira në tregun e ri të automjeteve në Bërnicë: Hapësira e ngushtë po paralizon shitjet

Tregtarët e automjeteve në kryeqytet po shprehin shqetësimet e tyre lidhur me kufizimet hapësinore në lokacionin e ri të tregut, i cili ndodhet në fshatin Bërnicë të Prishtinës. Sipas shitësve, zona aktuale ofron kushte të papërshtatshme, gjë që pengon ekspozimin e duhur të veturave dhe, si rrjedhojë, ka shkaktuar një rënie të ndjeshme të interesimit dhe shitjeve. Ngjashëm me praktikën e dikurshme në tregun e vjetër, edhe në këtë hapësirë të re zhvillohet tregti e llojllojshme, duke përfshirë artikuj ushqimorë, tekstil, shpezë dhe mallra të ndryshme. Tregtari Mentor Raçi ka ngritur alarmin se ky ambient nuk i përgjigjet standardeve të një tregu funksional. "Ky treg nuk i plotëson kushtet e pazarit. Më mirë ka qenë atje se këtu. Nuk ka asgjë që plotëson kushtet e tregut. Hapësira është e vogël, myshteritë s'kanë ku ndalen me shikua... Ka rënie të shitjeve", u shpreh ai. Një shqetësim të ngjashëm e ndan edhe tregtari Hysni Robelli, i cili thekson vështirësimin e qarkullimit dhe pamundësinë për të prezantuar automjetet siç duhet. "Shumë ngushtë është për automjete, shumë ngushtë. Derën s'kam ku me hapë, qe deshta me dalë, ku me dalë, duhet me pritë deri në fund. Ka ndiku fort edhe në aspektin e shitjes jashtëzakonisht shumë", deklaroi Robelli. Edhe Lam Kastrati e pranon se infrastruktura aktuale lë për të dëshiruar dhe bën thirrje për investime shtesë. "Më mirë se atje poshtë është se u rendojke shumë trafiku, por me pasë mundësinë me rritë, me zmadhu, me investu edhe pak më shumë. Hapësira e ngushtë", theksoi Kastrati. Përveç automjeteve, në këtë hapësirë vazhdojnë të shiten edhe pemë, perime, mobilje, veshmbathje dhe shpezë, duke ruajtur dinamikën e tregut tradicional. Kujtojmë se Komuna e Prishtinës kishte njoftuar se duke filluar nga e diela, 11 tetor 2026, tregu i dikurshëm i veturave në Zonën Industriale drejt Fushë Kosovës u zhvendos zyrtarisht në lokacionin e ri në Bërnicë të Poshtme, duke ftuar qytetarët dhe tregtarët që t'i drejtohen kësaj hapësire.