Flick thur elozhe për Yamal: Është futbollisti më i mirë në rruzull për momentin

Strategu i Barcelonës, Hansi Flick, ka thurur elozhe të larta për yllin e skuadrës, Lamine Yamal, duke e ngritur atë në majën e futbollit botëror me deklaratat e tij të fundit. Kryetrajneri gjerman ka shfaqur hapur krenarinë për paraqitjet e talentit spanjoll, i cili po konfirmohet gjithnjë e më shumë si shtylla kurrizore e gjigantit katalunas. “Lamine Yamal është lojtari më i mirë në botë për momentin. Kur e zëvendësova, i thashë: Lamine, jam krenar për ty”, është shprehur Flick. Krahas vlerësimit maksimal për formën e 18-vjeçarit, numri një i stafit teknik ka prekur edhe temën e mundësisë që Yamal të rrëmbejë trofeun prestigjioz “Topi i Artë”. Flick ka pranuar se do të ndjehej i lumtur nëse sulmuesi i talentuar do ta ngrinte këtë çmim personal, por ka vënë në pah se prioritet absolut për klubin mbetet triumfi në garat ekipore. “Do të isha i lumtur nëse ai do ta fitonte Topin e Artë. Por ne jemi të përqendruar së bashku në fitimin e titujve, pasi ky është misioni i qartë i Barcelonës”, ka përfunduar trajneri gjerman. Ndërkohë, Lamine Yamal vijon të mbetet një nga elementët më vendimtarë në skemat e katalunasve, ndërsa fjalët mirënjohëse të Flick dëshmojnë besimin e palëkundur që ai gëzon brenda projektit aktual të skuadrës.