Debutimi i vështirë i Karoglan te Partizani: Synimi i fitores ndaj Vorës pa praninë e tifozëve

Mislav Karoglan do të bëjë sot paraqitjen e tij të parë zyrtare në krye të stolit të Partizanit, duke u përballur me Vorën në një duel ku të kuqtë synojnë kthesën e madhe pas ecurisë jo të mirë të rezultateve të fundit. Kjo sfidë delikate do të zhvillohet pa praninë e tifozëve në shkallët e stadiumit, pasi klubi i Vorës, në cilësinë e organizatorit, vuan një dënim të dhënë nga Komisioni i Disiplinës. Pavarësisht kohës së kufizuar që ka pasur në dispozicion për t'u njohur nga afër me grupin dhe për të implementuar skemat e tij, trajneri kroat ka përcaktuar qartë synimin: nisjen e kësaj eksperience të re me tri pikë. Për takimin e së dielës, Karoglan pritet të hedhë në fushë elementët më në formë, duke iu besuar lojtarëve që shfaqen fizikisht dhe psikologjikisht më të gatshëm për këtë transfertë. Kjo përballje shënon provën e parë për kreun e ri të stolin për të dëshmuar ndryshimin e pritshëm dhe për të rikthyer entuziazmin dhe besimin brenda grupit të lojtarëve. Në portë pritet të pozicionohet Qirko, ndërsa mbrojtja parashikohet të përbëhet nga Marku, Mijan, Vata dhe Antanaskoski. Për sa i përket mesfushës, alternativat kryesore janë Dumbia dhe Onguleje, të cilët do të ndihmohen nga treshja Sidibe, Hjumën dhe Aliu në fazën e ndërtimit të aksioneve. Në repartin e sulmit, lojtari kryesor për majën e avancuar mbetet Skuka, ndërsa si opsion i vlefshëm konsiderohet edhe Faidaro.